Latest News

Slider Area

Featured post

தாயகத்தில் காணாமல் ஆக்கப்பட்ட உறவுகளுக்காக பிரித்தானியாவில் நடைபெற்ற மாநாடு

தாயகத்தில் காணாமல் ஆக்கப்பட்டவர்களை விரைவில் கண்டுபிடிப்பதற்கு அழுத்தம் கொடுக்கும் வகையில் பிரித்தானியா பாராளுமன்றத்தில் மாநாடு நடைபெற்றது...

தமிழீழம்

சினிமா

தமிழ் வளர்ப்போம்

September 05, 2019

தாயகத்தில் காணாமல் ஆக்கப்பட்ட உறவுகளுக்காக பிரித்தானியாவில் நடைபெற்ற மாநாடு
by admin - 0

தாயகத்தில் காணாமல் ஆக்கப்பட்டவர்களை விரைவில் கண்டுபிடிப்பதற்கு அழுத்தம் கொடுக்கும் வகையில் பிரித்தானியா பாராளுமன்றத்தில் மாநாடு நடைபெற்றது.
tgte

காணாமல் ஆக்கப்பட்டோர் தினத்தை முன்னிட்டு நேற்று நடைபெற்ற மாநாட்டினை, நாடு கடந்த தமிழீழ அரசாங்கம் ஏற்பாடு செய்திருந்தது.

யுத்தம் நிறைவடைந்து பத்து வருடங்கள் கடந்துள்ள நிலையில், இதுவரை காணாமல் ஆக்கப்பட்ட உறவுகளை கண்டுபிடிக்க இலங்கை அரசாங்கம் காத்திரமான நடவடிக்கைகளை முன்னெடுக்கவில்லை. இந்நிலையில் பிரித்தானியா உட்பட சர்வதேச நாடுகள் இலங்கை அரசாங்கத்திற்கு அழுத்தம் கொடுக்க வேண்டும் என மாநாட்டில் கோரிக்கை முன்வைக்கப்பட்து.

மாநாட்டில் பிரித்தானிய பாராளுமன்ற உறுப்பினர் Siobhain McDonagh, மனித உரிமைகள் செயற்பாட்டாளர்கள் மற்றும் நாடு கடந்த தமிழீழ அரசாங்கத்தின் உறுப்பினர்கள் கலந்து கொண்டனர்.
Read More

August 19, 2019

சாத்தான் முக்கோணத்தில் சிக்கி 90 ஆண்டுகளுக்குப் பிறகு தானாக திரும்பி வந்த மர்ம கப்பல்!
by admin - 0

90 ஆண்டுகளுக்கு முன்னர் காணாமல் போன எஸ் எஸ் கொடபக்சி (SS Cotopaxi) கப்பல் சமீபத்தில் கியூபா கடலோரத்தில், தடை செய்யப்பட்ட ராணுவ பகுதியின் வழியாக திரும்பி வந்துள்ளது.

1925 ஆம் ஆண்டு நவம்பர் 29ஆம் திகதி தெற்கு கரோலினாவின் சார்ல்ஸ்டனில் இருந்து க்யூபாவின் ஹவானாவை நோக்கி பயணிக்க தொடங்கியது எஸ் எஸ் கொடபக்சி (SS Cotopaxi) கப்பல்.

அதாவது சாத்தான் முக்கோணம் என்று அழைக்கப்படும் பெர்முடா முக்கோணத்தின் வழியாகவே இந்த கப்பல் ஹவானாவை சென்றடைய முடியும்.

ஆனால் புறப்பட்ட இரண்டாவது நாளிலேயே எஸ்எஸ் கொடபக்சி கப்பல் காணாமல் போனது, அதன் பின்பு அந்த கப்பல் பற்றிய தகவலே இல்லை. இந்த நிலையில் குறித்த கப்பல் தற்போது திரும்பி வந்துள்ளது.

ஆனால் திரும்பி வந்த கப்பலில் ஒருவரும் இல்லை என்றும், அந்த கப்பல் பல ஆண்டுகளுக்கு முன்பே கைவிடப்பட்ட நிலையில் இருக்கிறது என்றும் தகவல்கள் வெளியாகியுள்ளன.

இது குறித்து மேலும் தெரியவருவதாவது,

1925 ஆம் ஆண்டு நவம்பர் 29ஆம் திகதி தெற்கு கரோலினாவின் சார்ல்ஸ்டனில் இருந்து க்யூபாவின் ஹவானாவை நோக்கி எஸ் எஸ் கொடபக்சி (SS Cotopaxi) கப்பல் சாத்தான் முக்கோணம் என்று அழைக்கப்படும் பெர்முடா முக்கோணத்தின் வழியாக செல்ல ஆரம்பித்தது.

பெர்முடாவில் இருந்து மியாமி, பின் ஃப்ளோரிடாவில் இருந்து புவேர்ட்டோ, ரிக்கோவின் சாண் ஜுவன் ஆகிய பிரதேசங்களை இணைத்தால் உண்டாகும் பகுதி தான் பெர்முடா முக்கோணம் (Bermuda Triangle).

மர்மமான சாத்தான் முக்கோணத்தின் ஒரு புள்ளியான ஃப்ளோரிடாவை கடந்து தான் எஸ்எஸ் கொடபக்சி ஹவானாவை அடைய முடியும்.

ஆனால், அந்த கப்பல் ஹவானாவை சென்றடையவில்லை. புறப்பட்ட இரண்டாவது நாளிலேயே எஸ்எஸ் கொடபக்சி காணமல் போனது, அதன் பின்பு அந்த கப்பல் பற்றிய தகவலே இல்லை.

எஸ்எஸ் கொடபக்சி கப்பல் மட்டுமின்றி, இந்த கப்பலில் 2340 டன் எடையுள்ள நிலக்கரியுடன் கேப்டன் டபிள்யூ ஜே.மெயர் தலைமையில் பயணித்த 32 மாலுமிகள் பற்றிய எந்த விதமான தகவலும் இல்லை.

சமீபத்தில் கியூபா கடலோர காவல்படையினர், தடை செய்யப்பட்ட ராணுவ பகுதியின் வழியாக ஒரு கப்பல் தீவை நோக்கி வருவதை கண்டுள்ளனர்.

அதை தொடர்பு கொள்ள முயற்சி செய்து, பயன் அளிக்காததை தொடர்ந்து, அதன் அருகே சென்று பார்த்த போதுதான் அது 90 ஆண்டுகளுக்கு முன்பு காணாமல் போன எஸ்எஸ் கொடபக்சி என்று தகவல்கள் வெளியாகி உள்ளன.

அதனை தொடர்ந்து பெர்முடா முக்கோணத்தில் காணாமல் போன மிகப்பெரிய கப்பல்களில் ஒன்றான எஸ்எஸ் கொடபக்சி, ஒரு நாடோடி போல இத்தனை ஆண்டுகளாய் பெர்முடா முக்கோணத்துடன் இணைந்தே கிடந்துள்ளது.

திரும்பி வந்த கப்பலில் ஒருவரும் இல்லை என்றும், அந்த கப்பல் பல ஆண்டுகளுக்கு முன்பே கைவிடப்பட்ட நிலையில் இருக்கிறது என்றும் தகவல்கள் வெளியாகியுள்ளன.

கப்பலை ஆராய்ந்து பார்த்ததில் எஸ்எஸ் கொடபக்சி கேப்டனின் லாக் புக் (Log book) எனப்படும் குறிப்பு எழுதும் நோட்டு புத்தகம் கிடைத்துள்ளது.

ஆனால், அந்த நோட்டு புத்தகத்தில் கடந்த 90 ஆண்டுகளாய் எஸ்எஸ் கொடபக்சி கப்பலுக்கும், அதில் பயணித்த 33 பேருக்கும் என்ன நடந்தது என்பது பற்றிய ஒரு தகவலும் கிடைக்கப் பெறவில்லை.

க்யூபா நாட்டு அரசாங்கம், எஸ்எஸ் கொடகப்சி கப்பல் காணமல் போனது ஏன்..? மற்றும் திரும்பி கிடைக்கப்பெற்றது எப்படி..? என்பது பற்றிய விசாரணையை தொடங்கியுள்ளது.
Read More

July 24, 2019

"கறுப்பு யூலை" தமிழினவழிப்பின் 36ஆம் ஆண்டினை நினைவு கூரி லண்டனில் நடைபெற்ற கவனயீர்ப்புப் போராட்டம்.!
by admin - 0

"கறுப்பு யூலை" தமிழினவழிப்பின் 36ஆம் ஆண்டினை நினைவு கூரி லண்டனில் நடைபெற்ற கவனயீர்ப்புப் போராட்டம்.!


யாழ் திருநெல்வேலியில் தமிழீழ விடுதலைப் புலிகளின் முதலாவது பாரிய தாக்குதலின் போது 13 இலங்கை படையினர் கொல்லப்பட்டதை ஏற்றுக்கொள்ள முடியாத இனவெறி சிங்கள அரசு பெருமெடுப்பிலான இனக்கலவரத்தை கட்டவிழ்த்து விட்டது. இலங்கைத் தீவின் பல பாகங்களிலும் இலங்கை அரசின் கைக்கூலிகளினாலும், படையினரினாலும் தமிழர்கள் அழிக்கப்பட்டனர். 1983ஆம் ஆண்டு யூலை மாதம் 23ஆம் திகதி தொடக்கம் 10 நாட்களுக்கு மேலாக இலங்கைத்தீவில் தமிழர்களுக்கு எதிராக திட்டமிடப்பட்டு மேற்கொள்ளப்பட்ட இனவழிப்பே "கறுப்பு யூலை" ஆகும். இக் கொடூர சம்பவத்தில் 3,000க்கும் மேற்பட்ட தமிழர்கள் கொடூரமாக கொல்லப்பட்டும், பல பெறுமதியான சொத்துக்களும் அழிக்கப்பட்டன. இக் கரிய நாளை நினைவு கூரும் முகமாக 23/07/2019 அன்று பிரித்தானியப் பிரதமரின் அலுவலகத்திற்கு முன்பாக (10 Downing Street) கவனயீர்ப்புப் போராட்டம் மாலை 5 மணி முதல் 7 மணி வரை நடைபெற்றது.
Read More

தமிழினப்படுகொலையின் நீதிகோரி, பிரித்தானிய பிரதமர் வாயிற்தளத்தில் கவனயீர்ப்பு போராட்டம்
by Editor - 0

இலங்கைத்தீவில் தமிழர்கள் மீதான திட்டமிட்ட இனப்படுகொலைகளில் ஒன்றாகவுள்ள கறுப்புயூலை 1983 தமிழினப்படுகொலையின் நீதிகோரி, பிரித்தானிய பிரதமர் வாயிற்தளத்தில் கவனயீர்ப்பு போராட்டம் இடம்பெற்றது. எதிர்வரும் யுலை 23ம் நாளன்று, கறுப்புயூலையின் 36வது ஆண்டு நினைவு வணக்க நிகழ்வுகள் உலகெங்கும் இடம்பெற இருக்கின்ற நிலையில், முன்னராக 21ம் நாளன்று நீதிகோரும் கவனயீர்ப்பு போராட்டம் இடம்பெற்றிருந்தது. நாடுகடந்த தமிழீழ அரசாங்கத்தின் ஒருங்கிணைப்பில் முன்னெடுக்கப்பட்டிருந்த இந்த ஒன்றுகூடலில் பெருந்திரளானவர்கள் பங்கெடுத்திருந்தனர்.
    

காலம் பல கடந்து சென்றாலும் ஈழத் தமிழர் தேசத்தின் அரசியல் ஆன்மாவில் ஓர் பெரும் துயர வடுவாக நிலைத்திருப்பதோடு, என்ன விலை கொடுத்தேனும் அரசியல் சுதந்திரத்தை அடைந்தே தீர வேண்டும் என்ற பற்றுறுதியை தமிழர் தேசத்திடம் கறுப்பு யூலை நினைவுகள் விதைத்திருக்கின்றன என இக்கவனயீர்ப்பு போராட்ட செய்தியில் தெரிவிக்கப்பட்டுள்ளது.
Read More

July 17, 2019

பேருந்தில் எழுதப்பட்டுள்ள தமிழ் கெட்ட வார்த்தை; ஸ்ரீலங்காவில் தொடரும் தமிழ் கொலைகள்?!
by admin - 0

இலங்கையில் தமிழ் மொழிகளில் பெயர்பலகைகள் வைக்கும் போது தற்பொழுது பெரும்பாலும் பிழையான எழுத்துக்களில் இருப்பதை காணக்கூடியதாக இருக்கிறது.

அதிலும் சில தமிழ் சொற்கள் பிழையான அர்த்தத்தை ஏற்படுத்திவிடுகிறது.

இந்நிலையில் இவ்வாறான தமிழ் கொலைகளை பார்க்கும்போது தமிழ் மக்கள் மத்தியில் அதிருப்தியை ஏற்படுத்துகின்றது.

இதற்கு அரசு தரப்பும் போதிய கவனம் எடுக்காமல் தொடர்ந்து தமிழ் மொழி பாதாதைகள் எழுத்துப்பிழையாகவே காட்ச்சிப்படுத்தப்பட்டு இருப்பதை பார்க்க இவ்வாறான செயற்பாடுகள் திட்டமிட்டு அரங்கேற்றப்படுகின்றதா என்ற சந்தேகம் தமிழ் மக்கள் மத்தியில் எழுகின்றது.

இப்படித்தான் இது 'கண்டி' என்ற ஊருக்குச் செல்லும் பேருந்து.

ஊரின் பெயர் எப்படி எழுதப்பட்டிருக்கின்றது என்று நீங்களே பாருங்கள்..

குறித்த புகைப்படம் தற்போது சமூக வலைத்தளங்களில் பரவலாக பகிரப்பட்டுவருகிறது,

இது தொடர்பில் அரச கருமமொழி அமைச்சரின் பதில் என்ன? திருத்தப்படுமா இவ்வாறான பிழைகள்..?
Read More

July 12, 2019

அமைச்சுப் பதவியை ஏற்கவுள்ள ரிஷாட்டுக்கு மீண்டும் எச்சரிக்கை விடுத்துள்ள அத்துரலிய!
by admin - 0

ஸ்ரீலங்கா அரசாங்கத்தில் அங்கம் வகித்த முன்னாள் அமைச்சர் ரிஷாட் பதியூதீனுக்கு மீண்டும் அமைச்சுப் பதவி வழங்கினால், மீண்டும் ஒருமுறை அவருக்கு எதிராக நம்பிக்கையில்லாப் பிரேரரணை கொண்டுவரப்படும் என்று நாடாளுமன்ற உறுப்பினர் அத்துரலிய ரத்ன தேரர் எச்சரிக்கை விடுத்துள்ளார்.

பதவி விலகிய முஸ்லிம் அமைச்சர்கள் மீண்டும் பதவிகளை பொறுப்பேற்கவுள்ளதாக நேற்றைய தினம் எடுத்த தீர்மானம் குறித்து கருத்துரைத்த போதே, அவர் மேற்கண்டவாறு தெரிவித்தார்.

நாட்டில் உயிர்த்த ஞாயிறு தினத்தன்று மேற்கொள்ளப்பட்ட தொடர் தற்கொலைத்தாக்குதலின் பின்னர் பல்வேறு சர்ச்சைகளில் சிக்கிய ரிஷாட் உட்பட சில அமைச்சர்கள் ஆளுநர்கள் மீது பல்வேறு குற்றச்சாட்டுக்கள் முன்வைக்கப்பட்டு அவர்கள் தமது பதவியை துறக்க வேண்டும் எனவும் வலியுறுத்தப்பட்டது.

அதனடிப்படையில் அவர்களுக்கெதிராக போராட்டங்களும் முன்னெடுக்கப்பட்டன அதன் விளைவாக முஸ்லிம் அமைச்சர்கள் அனைவரும் ஒட்டுமொத்தமாக தமது பதவியை இராஜினாமா செய்தனர். அதன் பின்னர் ஐக்கிய தேசிய கட்சி உட்பட மல்வத்து அஸ்கிரிய பீட மகாநாயக்க தேரர்கள் அனைவரும் வேண்டுகோள் விடுத்திருந்தனர்.

எனினும் தம் மீதான குற்றங்களை நிரூபிக்கும் வரை தாம் அமைச்சுப் பதவிகளை ஏற்கப்பபோவதில்லை என தெரிவித்திருந்தனர். எனினும் நேற்றைய தினம் தாம் அனைவரும் மீண்டும் தங்களின் அமைச்சுப்பதவிகளை ஏற்றுக்கொள்ள தீர்மானித்திருப்பதாக தெரிவித்திருந்தமையும் குறிப்பிடத்தக்கது.
Read More

July 06, 2019

பலத்த பாதுகாப்புக்களுக்கு மத்தியில் நீராவியடிப் பிள்ளையார் ஆலய வருடாந்த உற்சவம்
by admin - 0

பழைய செம்மலை நீராவியடிப் பிள்ளையார் ஆலயத்தின் வருடாந்த உற்சவம் இன்று அதிகாலை ஆரம்பமாகி
பல்வேறு சர்ச்சைகளுக்கு மத்தியில் இன்று அதிகாலை 3 மணி அளவில் கோட்டைக்கேணி பிள்ளையார் ஆலயத்தில் மடை பரவி பூசைகள் இடம்பெற்று அதனைத் தொடர்ந்து அங்கிருந்து மடப்பண்டம் எடுத்து வரப்பட்டு நீராவியடிப் பிள்ளையார் ஆலயத்திற்கு கொண்டுவரப்பட்டு அங்கே தமிழர் திருவிழா பொங்கல் உற்சவங்கள் ஆரம்பமாகின. 
இந்த நிலையில் ஆலயத்தில் பூஜை வழிபாடுகளுக்கு நூற்றுக்கு மேற்பட்ட பொலிஸார் பாதுகாப்பு கடமைகளில் ஈடுபடுத்தப்பட்டு பொங்கல் நிகழ்வுகள் சிறப்புற இடம்பெற்றது.
எவ்வாறாயினும் நீராவியடிப் பிள்ளையார் ஆலயத்தின் வருடாந்த உற்சவ நிகழ்வுகளை தடுக்கும் வகையில் குறித்த பகுதியில் பொலிஸாரும் பௌத்த பிக்குகளும் பொது மக்களுக்கு இடையூறுகளை ஏற்படுத்தியிருந்தமை குறிப்பிடத்தக்கது.





Read More

July 02, 2019

விடுதலைப் புலிகளால் பாதுகாக்கப்பட்ட இலங்கையின் மிகப் பெரிய சொத்து….!! தமிழர் தலைநகரில் தலை நிமிர்ந்து நிற்கின்றது
by admin - 0

தமிழர் தலைநகரான திருகோணமலையில் தமிழர் பறைசாற்றும் பல பொக்கிஷங்கள் காணப்படுகின்றன. இவை அனைத்தையும் விடுதலைப்புலிகள் பாதுகாத்து வந்தமைக்கு பல சான்றுகள் இருக்கின்றன.

ஆதி காலம் தொட்டு இன்று வரை இலங்கையில் தமிழர் அடையாளங்கள் அழிக்கப்பட்டு வருகின்றன. ஆனால் விடுதலைப்புலிகள் இருந்த காலத்தில் அவை பாதுகாக்கப்பட்டு வந்ததை யாரும் மறுக்க முடியாது.

அந்த வகையில் திருகோணமலையில் விடுதலைப்புலிகளினால் பாதுகாக்கப்பட்ட கந்தளாய்க் குளத்தின் வரலாற்றினைப் பற்றி சற்று நோக்குவோம்.

கந்தளாய் குளம்...

திருகோணமலை - கந்தளாய், தம்பலகாமம் மற்றும் அதை அண்டிய விளை நிலங்களுக்கு நீர்ப்பாசனத்துக்கும் ஒட்டு மொத்த திருகோணமலையின் குடி நீர் விநியோகத்துக்கும் கந்தளாய் குளமே பயன்படுகின்றது.

பண்டையில் திருகோணமலை இராஜ்யத்தை ஆட்சி செய்த வன்னி அரசர்கள் ஆளும் வசதி கருதித் திருக்கோணமலைப் பிரதேசத்தை மூன்று பற்றுக்களாகப் பிரித்தனர்.

மாவட்டத்தின் மத்திய பற்றின் தலைமை இடமான தம்பலகமத்துக்குத் தெற்கே பதினான்கு மைல் தூரத்தில் கந்தளாய் ஊர் அமைந்துள்ளது.

இந்த ஊரில் பெரிய குளம் ஒன்றை அமைப்பதாக அநுராதபுர அரசி ஆடக சௌந்தரியுடன் குளக்கோட்டு மன்னர் விவாக ஒப்பந்தம் செய்து கொண்டார்.

அரசியின் துணையுடன் இங்கு கட்டிய பெரிய குளத்துக்குத் திருக்குளம் என்ற பெயரே வழக்கில் இருந்து வந்தது.

பிற்காலம் அநுராதபுரத்தில் இருந்து அரசாண்ட புவனேய கயவாகு என்னும் மன்னன் சமணனாக மதம்மாறி சைவ ஆலயங்களை இடித்தழிக்கும் நோக்கில் வந்தான்.

அப்போது அவனுக்கு திடீரென கண்கள் பார்வை குன்றி குருடாகியது. மன்னனும் படைகளும் ஆறாத்துயரத்தில் ஆழ்ந்து அவ்விடத்திலேயே கூடாரமிட்டுத் தங்கினர்.

கவலையில் மூழ்கிக்கிடந்த அரசனின் கனவில் ஒரு முதியவர் தோன்றி “உன் தீய எண்ணத்துக்குத் தகுந்த தண்டனை பெற்றாய் ஆயினும் இறைவனைத் துதித்து தர்மசீலனான குளக்கோட்டன் அமைத்த நன்னீர்க் குளத்தில் தீர்த்தமாடினால் உன் துயர் அகலும்” என்று கூறி மறைந்தார்.

அப்பெரியாரின் கூற்றுக்கமைய பக்திப்பரவசம் அடைந்த அரசன் திருக்குளத்தில் தீர்த்தமாடிய போது அதிசயிக்கத்தக்க விதமாகக் கெட்டுப்போன கண்பார்வை மீண்டும் ஒளிவீசி பிரகாசித்தது.

கெட்டுப்போன கண் தழைத்த காரணத்தால் திருக்குளம் என்று வழக்கில் இருந்த பெயர் மறைந்து கண்தழை என்ற காரணப்பெயரே வழங்கலாயிற்று.

அடுத்துள்ள சதுர்வேத மங்கலம் என்ற பெயரும் மறைந்து, கண் தழை என்ற பெயரே ஊருக்கும், குளத்துக்கும் வழங்கப்படலாயிற்று.

இப்பெயரே காலப்போக்கில் திரிந்து கந்தளாய் என்று அழைக்கப்படுவது குறிப்பிடத்தக்கது.

தற்போதைய பின்னணி...

இன்று இது போன்ற அரிய பல சரித்திரங்கள் மாற்றப்பட்டுவிட்டன. அணைக்கட்டோரங்களில் நின்று அழகு செய்த வான் தருக்கள் வெட்டி அழிக்கப்பட்டுள்ளன.

பழமையில் இந்த அணைக்கட்டுக்கு பாதுகாப்பாக குளக்கோட்டனின் வேண்டுதலுக்கமையவே நாராயண மூர்த்தியால் அணைக்கட்டோரம் விநாயகர் ஆலயம் ஒன்று பிரதிஷ்டை செய்யப்பட்டது.

இக்குளத்திலிருந்து வரும் பேராறு படிப்படியாக உள்ள கற்பாறைகளில் விழுந்து சலசலத்த ஓசையுடன் ஆலயத்தை வலமாக வளைந்து அஞ்சலி செய்து செல்வது பார்க்கப் பரவசமூட்டுவதாக இருக்கும்.

ஆற்றோரம் எங்கும் பலா மரங்கள் காய்களைச் சுமந்து கொண்டு நிற்கும் காட்சி மனதிற்கு உவகை ஊட்டுவதாக இருக்கும்.இத்தகைய அழகுமிகு இயற்கைக்காட்சிகள் இன்றில்லை.

ஆலயத்தை சுற்றிவளைத்து ஓடிய ஆற்றின் கிழக்குப் பகுதியைத் தூர்த்து குடியிருப்புக்களை உண்டாக்கிவிட்டார்கள்.
ஒரு காலத்தில் இந்த பழம் ஊரில் வேதம் ஓதும் மறையோர்கள் வாழ்ந்ததும் அதன் காரணமாக சதுர்வேத மங்கலம் என்ற காரணப்பெயர் இருந்ததும் அடியோடு மாறிவிட்டது. 
நாடு சுதந்திரமடைந்த பின் துரித வளர்ச்சி அடைந்து கந்தளாய்ப் பட்டினம் என்ற பெயரே நிலை கொண்டுள்ளது.
1986 இல் கந்தளாய் நீர்த்தேக்கம் உடைத்துக்கொண்ட போது நாராயண மூர்த்தியால் ஸ்தாபிக்கப்பட்ட அணைக்கட்டு விநாயகர் ஆலயம் முற்றாக அழிக்கப்பட்டாலும் சைவப்பெருமக்கள் ஆலயத்தைத் திரும்பக்கட்டி இருப்பது பாராட்டுக்குரியதாகும்.
முதலாம் அக்கிரபோதி கந்தளாய்க்கு கால்வாய் வெட்டி வந்தான் என்ற சரித்திரத்தின் கூற்று முதலாம் அக்கிரபோதியின் ஆட்சிக்கு முன்பும் கந்தளாயில் குளம் இருக்கிறது என்பதை உறுதிப்படுத்துகின்றது.
இது போக கந்தளாய் அண்மித்த பகுதி அக்போ புர என்று மெல்ல மெல்ல பெயர் மாற்றப்பட்டு வருகின்றது வென்றரசன் குளம்.
திருமலை இராஜ்ஜியத்தின் ஒரு பகுதியாக இருந்த சதுர்வேத மங்கலத்தை இன்றைய கந்தளாயை தென்னிலங்கை வேந்தன் ஒருவன் வென்றான். 
அவன் வென்றரசன் என்றே அழைக்கப்பட்டான். ஏற்கனவே இருந்த கந்தளாய் குளத்தின் கிழக்குப்புற அணைக்கட்டுடன் தானும் ஒரு குளத்தை அமைத்தான் அந்தக்குளம் வென்றரசன் குளம் என்று இன்றும் அழைக்கப்படுகிறது.

அணைக்கட்டின் உச்சியில் நின்று குளத்தின் நீர்ப்பரப்பைப் பார்த்தால் கடல்போலவும், கட்டின் அடிவாரத்தில் நின்று அணையின் உச்சியை நோக்கினால் கட்டு பெரிய மலை போலவும் தெரியக்கூடியதாகக் குளம் பிரமாண்டமானதாக அமைக்கப்பட்டதெனக் காவியம் கூறுகிறது.

இந்தக்குளத்தின் அணைக்கட்டை முதல்முதலாக பார்ப்பவர்கள் வியப்பில் ஆழாமல் இருக்கமுடியாது. 

இயந்திர சாதனங்கள் அற்ற அந்தக்காலத்தில் இப்படி ஒரு பிரமாண்டமான அணையை அமைக்க, இலட்சக்கணக்கான சனங்கள் தினந்தோறும் வேலை செய்தாலும் பல்லாயிரம் வருஷங்களாவது செல்லுமே என்ற எண்ணம் எவருக்கும் வரவே செய்யும்.

IBC
Read More

நாளைய நாள் தொடர்பில் மைத்திரியின் அறிவிப்பால்! மிகப் பெரும் எதிர்பார்ப்பில் மக்கள்
by admin - 0

மைத்திரிபால சிறிசேனவின் எண்ணக்கருவிற்கு அமைவாக இலங்கையின் முதலாவது தொழில்நுட்ப நூதனசாலை மற்றும் நூலகம் பொலநறுவையில் திறக்கப்படவுள்ளது.

நாளைய தினம் மைத்திரிபால சிறிசேனவினால் இவை பொலன்னறுவை புதிய நகரத்தில் திறந்து வைக்கப்படவுள்ளது.

இலங்கையில் கட்டப்பட்ட முதலாவது தொழிநுட்ப நூதனசாலை மற்றும் நூலகம் இவையாகும். இதற்கு 90 மில்லியன் ரூபா செலவிடப்பட்டுள்ளது.

இந்த தொழிநுட்ப நூதனசாலை மற்றும் நூலகத்தின் மூலம் பயனடைவதற்காக மக்கள் பெரும் எதிர்பார்ப்பில் உள்ளதாக தெரிவிக்கப்படுகின்றது
Read More

June 28, 2019

இந்தியத்தின் சதியால் மீண்டும் ஓர் தீயின் சங்கமமாய் 1996.03.10 அன்று அலைகடலில் தடம் பதித்த உயிராயுதங்கள்
by admin - 0

தமிழீழ விடுதலைப்போரின் தியாகத்தின் உச்சங்கள் வார்த்தைகளால் வர்ணிக்க முடியாத அளவிற்கும், மனித வாழ்வில் ஓர் வரையறையைத் தாண்டி இப்படியுமா என வியக்கும் வண்ணமும் ஒவ்வொரு போராளியின் வீரமரணத்தின் பின்னும் ஆயிரம் ஆயிரம் வரலாறுகள்….

தேசியத் தலைவரின் அன்பில் திளைத்து உருவான உன்னதர்களின் செயலே தெய்வத்தைவிடவும் பல படி மேலாக தமிழீழத்தின் காவலர்கலாகவே இன்றுவரை பூசிக்கின்றோம். ஒவ்வோர் மகனை, மகளை வீரர்களாய்ப் பார்க்கையிலே பெற்றமனம் சற்று அவ்வீரர் குடியிருந்த கருவறை தொட்டு மெய்சிலிர்த்து பூரிப்படையும் இது தமிழீழத்தின் ஒவ்வோர் தாயின் வரலாகாகவும் இருக்கிறது…..

எம்மினத்தின் விடியலின் போராட்டம் அன்று தொடக்கம் இன்றுவரை தேசம் விட்டு பல கடல் எல்லைகள் தாண்டி விரிந்து சென்றும் எம் தேசத்தை தாங்கியவர்கள் பலர் அதில் பலரது முகமும் தெரியாது, தியாகமும் வெளித் தெரிவதில்லை….

காலம் ஒருநாள் பதிவாக்கும் என்பதில் ஐயமில்லை…..

இந்தியத்தின் சதியால் கடலன்னை மடியில் தமிழீழத்தின் திசையாவும் வேதனையின் குரல்கள் கேட்கும் படியான ஓர் தியாக வேள்வியை நிலைப்பித்தனர் அந்த சர்வதேசக் கடற்பரப்பில்…

இப்படியாக விடுதலைக்கு பலம் சேர்க்கும் பல வழிகளில் அலைகடலில் ஓர் பயணமாகி தேசம் விட்டு பல மைகள் தொலைவாகி கரைகாணாத ஓர் எல்லைக்கு காலக்கடமை இட்டு செல்கிறது.

அப்படியாக ஒரு முறை இரு போராளிகள் கடற்புலிகளின் பாசறைக்கு வருகின்றார்கள்.

காலத்தின் கடமை பல இருப்பினும் அவர்களுக்கு வழங்கப்பட்ட ஓர் கடமைக்கு தம்மை தயார்படுத்த அந்த முகாம் அவர்களை அங்கு உள்வாங்குகிறது. உண்மையில் பொறுப்பாளரையும், போராளிகள் சிலரையும் தவிர வேறு யாருக்கும் அவர்கள் யார் ..? என்ன பிரிவு…? என தெரியாது….!

பின்பு பல தோழமையாளர்கள் அதிகரிக்க உறவுகளும் வளர்ந்தது, அங்கு அவர்கள் இயந்திரப் பொறியியல், மற்றும் பல கடமைகள் சில நாட்கள் சமையலாளராக கடமை செய்தார்கள்.

பின்பு சில நாட்கள் செல்ல அவர்களும் அனைவரும் பிரிவின் துயரில் தவிக்க கடமை மாற்றம் என்று கூறி புன்னகைத்து சென்றார்கள்.

ஆயினும் எங்கு சென்றார்கள் என தெரியாது… ஆயினும் அந்த பாசறையின் மரங்கள், கொட்டில்கள், ஏன் சண்டைப்படகுகள், படகு காவிகள் (டொக்), விளையாட்டு திடல் எங்கும் அவர்களின் நினைவுகள் கலந்து இருந்தது.

அந்த வேதனைகளை என்னால் வார்த்தைகளாலும் கூறமுடியாது…. எழுத்துக்களாலும் வடித்திட முடியாது….

ஆயினும் விடுதலைக் கனவுடன் நீண்ட தூரம் சென்றனர் என்று நாட்கள் ஆக ஆக அலையெறி வந்த வீரர்கள் கூறக்கேட்டோம்.

ஒரு நாள் வானொலியில் ஒலிக்கிறது ஓர் செய்தி…..

“விடுதலைப் புலிகள் பயங்கரவாதிகளின் கப்பல் அழித்துவிட்டதாக இந்தியா..”

ஒரு முறை தூக்கி வாரிபோட்டது…
மனம் அது யாரு…?
எத்தனை பேர்…?
என்ன நடந்தது…?
ஏன் இப்படியாக பொய்யாக இருக்கக்கூடாதா என அனைவர் மனதில் எழும் வினா முகத்திலும் தெரிந்தது…

என்னத்தை கதைப்பது வார்த்தைகள் வரவில்லை, பொறுப்பாளரின் கொட்டிலுக்கு ஓடிசென்று வினவினோம்.

என்ன அண்ணா இப்படி ஓர் செய்தி….?

அவர் முகத்திலும் மெளனம்…. அவரின் முக பாவனையும் சற்று நெருங்கிய தோழர்கள் என்பதை ஊகித்தோம்.

பின்பு கேட்டோம் அண்ணா…. கூறுங்கள்.

ஆம்…. அது எங்கட கப்பல் ஒன்………..று இன்று……………

எத்தனை போராளிகள் இருந்தவர்கள் அண்ணா….?

இல்லை அதில் நம்ம……. தோழனும்…. நவ…..நீதனும் தான்….

காரிருள் சூழ்ந்தது போன்று இருந்தது….. பின்பு அந்த கடல் கரையிலிருந்து கடலைப் பார்த்தும், சில போராளிகள் மரத்தின் வேரில் படுத்தபடி வானைப் பார்த்து மெளனமாய் ஆயிரம் ஆயிரம் சோக மொழிகள் ஒவ்வோர் மனதிலும்……

சற்று அந்த வீரர் கரைந்த அலைகடல் நோக்கி……………

அங்கே ஓர் மாலைப் பொழுதில் இந்தியக் கடற்படை வந்து மறித்தது. அது ஓர் சர்வதேசக் கடல் எல்லை அது இந்தியா எல்லையுமில்லை, சிங்கள தேச எல்லையுமில்லை…..

ஆழக்கடல் எங்கு எம் முப்பாட்டன் நாட்டிய கொடியுடன் எம் கரிகாலன் சேனைகள் மக்களின் அத்தியாவசியப் பொருட்களை தாயகம் கொண்டு வந்து சேர்க்க உலகப் பரப்புயாவும் உலாவந்தனர்கள்……

தமிழீழத்திலிருந்து பல ஆயிரம் கடல்மைல் தொலைவிற்கு அப்பால் பாரதத்தின் நயவஞ்சக எண்ணத்துடன் அன்று தன் திமிரோடு வந்து மறித்தது எங்கள் எம்.வி மாரியம்மா கப்பலை ஆயினும் அவர்களின் எண்ணம் போல் அங்கு நடக்கவில்லை அதாவது….

உடனே இந்தியக் கடற்படை எம்.வி மாரியம்மா கப்பலை நோக்கி துப்பாக்கி எச்சரிக்கை வேட்டுக்களை தீர்த்து வெட்டுகளை தீர்த்தது, மிரட்டிப் பார்த்தது ஆயினும் போராளிகள் பணியவுமில்லை. அவன் சொல்லுக்கு இனங்கவுமில்லை….

எமது தலைமைப் பணியகத்துக்கு நிலைமை அறியப்படுத்தப்பட்டது…

பின் இந்தியக் கடற்படை போராளிகளின் கப்பல் என தெரிந்தும் அச்சுறுத்தல் வேட்டுக்களை மேலும் தீர்த்தது. ஆயினும் கப்பல் பயணித்த வண்ணம் தான் இருந்தது….

அனைவர் எதிர்பாராத ஓர் முடிவு எம்.வி மாரியம்மா கப்பலில் அப்போது செய்யப்படுகிறது.

நாங்கள் இவர்களிடம் சரணடைய மாட்டோம். இவர்களுக்கு நாம் யாரு என காட்ட வேண்டும் என முன்வருகின்றனர் அந்த கடற்கரும்புலி மறவர்கள் ஆயினும் கப்பலை தாங்கள் கொண்டு செல்வதாகவும் நீங்கள் தப்பி சென்று மற்றவர்களுடன் இணையுங்கள் என…

ஆயினும் மற்றவர்களால் இந்த முடிவு ஏற்றுக்கொள்ள முடியவில்லை என்றாலும் அப்போதைய கள சூழலும் காலத்தின் தேவையும் மாறியிருந்ததால் விருப்பமும் இன்றியும் சக தோழர்களையும், அதிலிருந்த பொருட்களையும் பிரிய மனமின்றி போராளிகள் மறு ஆயத்தங்களை செய்தனர்.

காரணம் உயிரிழப்புகள் அதிகரிக்க அந்த கடற்கரும்புலி மறவர்கள் விரும்பவில்லை, நீங்கள் என்னும் பல சாதனைகளை நிலைநாட்ட வென்றும் என கூறி கப்பலில் 2 கரும்புலிகள் தவிர ஏனைய போராளிகள் கப்பலில் இருக்கும் சிறு உதவிப் படகில் ஒரு தொலைத் தொடர்பு சாதனத்துடன் மட்டும் கடலில் இறங்கினார்கள். அது சிறிய படகு என்பதாலும், அலைகளின் எழும்பும் வேகம் அதிகமானதாக இருந்ததாலும் இந்தியக் கடற்படையின் கண்காணிப்புக் கருவியிலும் அது தெரியவில்லை.

உடனே கடற்கரும்புலிகள் மேஜர் நவநீதன், கப்டன் தோழன் முகத்தில் தாம் போராளிகளைக் காப்பாற்றி சந்தோசத்துடன் முகத்தில் புன்னகை மலர விடை கொடுத்து பிரிந்து சென்றார்கள்…

அன்று எம்மிடம் நவநீதன் – தோழனால் அனுப்பப்பட்ட போராளிள பலர் பின்பு அதே கடலில் பல வருடம் கழித்து சாதனை நிலைநாட்டினர். சிலர் இன்று யாவும் மறந்து தன் குடும்பம் தான் முக்கியம் என்று இவர்களை மறந்து தங்கள் வாழ்வை வீணடிப்பதா அதாவது வீணா சாவதா சென்று என கேள்வி எழுப்பி இன்று ஓர் தேசத்தில் வாழ்கின்றனர் இவர்களுக்கு காலம் ஒரு நாள் தீர்ப்பு வழங்கும்….

போராளிகள் இருந்த சிறு படகு வேறு திசைநோக்கி பிரிய மனம் இன்றி அலையில் தாவி தாவி சென்றது. ஆனால் அவர்கள் அனைவரின் மனமும் எதோ குமுறிய வண்ணம் இருந்ததது….

அவர்கள் விழிகள் அந்த கடற்கரும்புலிகள் பயணித்த கப்பலையே பார்த்த வண்ணம் இருந்தது.

கப்பலை திசைதிருப்பி இந்தியக் கடற்படையையும் தம் திசை நோக்கி அழைத்துச் சென்றனர் கரும்புலி மறவர்கள்…..

எதிரியானவனும் கலங்க இங்கே உறவுகள் தவிக்க இதுதான் உறுதியின் வெளிப்பாடு என எழுதி வைத்து ….. அந்த நேரத்தில் சமையல் வாயு எரிகலன் (L.P.G) வாயு கொல்கலன் கொண்டு கப்பலை வெடிக்க வைக்க சிறு தூரத்தில் ஓர் பெரிய வெடியோசையுடன், பெரு வெளிச்சமும் அந்த அலைகடலை சூழ்கிறது.

மற்றப் போராளிகளும் சிறு மணித்தியாலம் கழித்து மற்றைய எம் கப்பல் வந்து மீட்டனர் அப்போது அதில் ஒருவராக அந்தக் கரும்புலி மறவர்களால் அனுப்பப்பட்ட லெப்.கேணல் திருவருள் அண்ணா பின்னாளில் 2007 “எம்.வி. கொசியா” கப்பலில் வீரச்சாவைத் தழுவிக்கொண்டார்.

அவர் அன்று கூறிய வரலாறு இன்றும் என் காதோரம் ஒலிக்கிறது. அவரின் விம்பமும் அந்த எம்.வி மாரியம்மா கப்பலில் காப்பற்றப்பட்ட ஓர் சிலரும் யாவும் மறந்து தனக்காக என்ற வாழ்வை வாழும் போதும் பார்க்கையிலே வேதனைதான் சூழ்கிறது.

என்னதான் மாற்றம் வரினும் வீரர்களின் இலட்சியக் கனவு ஓர்நாள் நனவாகும் தரையிலும் கடலிலும் ஒப்பற்ற வீரர்களின் தியாகங்கள் நீளும் அதிலே ஈழம் பிறக்கும் அன்று அந்த அலைகடல் ஏறி வருவோம் எம் தேசத்தின் வாசலான உம் கல்லறைக் கோவில்களுக்கு…..

நினைவுகளுடன் என்றும் அ.ம.இசைவழுதி (தமிழீழப் பறவை கனடாவில்….)

“புலிகளின் தாகம் தமிழீழத் தாயகம்"
Read More

June 21, 2019

கல்முனையில் பதற்றம்,பேச்சுவார்த்தை தோல்வி; தொடர்கிறது போராட்டம்
by Editor - 0

கல்முனை போராட்டக்காரர்களுக்கும் அரச தரப்பிற்கும் இடையிலான பேச்சுவார்த்தை தோல்வியடைந்ததால் அங்கு பதற்றம் ஏற்பட்டுள்ளது.

இதனால் போராட்டம் தொடர்ந்தும் முன்னெடுக்கப்படுவதாக அங்கிருந்து வரும் செய்திகள் தெரிவிக்கின்றன.
அம்பாறை, கல்முனை வடக்கு தமிழ் பிரதேச செயலகத்தை தரமுயர்த்துமாறு கோரி மதகுருமார்கள் நடத்தும் போராட்ட இடத்துக்கு நாடாளுமன்ற உறுப்பினர் எம்.ஏ.சுமந்திரன், அமைச்சர் மனோ கணேசன் மற்றும் தயா கமகே ஆகியோர் அங்கு நேரடியாக சென்றிருந்தனர்.

கல்முனை வடக்கு பிரதேச செயலகம் குறித்து பிரதமர் விடுத்துள்ள செய்தி, போராட்டத்தில் ஈடுபட்டுள்ள மதகுருமார்களுக்கு அறிவிக்கப்பட்டது.
எனினும், குறித்த அறிவிப்பு திருப்தியளிக்காத நிலையில், பேச்சுவார்த்தை தோல்வியடைந்துள்ளது.

அத்துடன் அங்கு குழப்பநிலையும் ஏற்பட்டுள்ளது.
அங்கு குடியிருந்த பொதுமக்கள் கடுமையான எதிர்ப்பை தெரிவித்துள்ளனர்

Read More

June 05, 2019

தியாகி பொன்.சிவகுமாரன் அண்ணா அவர்களின் 45 ஆம் ஆண்டு வீரவணக்க நாள் இன்றாகும்,
by admin - 0

தியாகி பொன்.சிவகுமாரன் அண்ணா அவர்களின் 45 ஆம் ஆண்டு வீரவணக்க நாள் இன்றாகும்,



தமிழீழ விடுதலைப்போராட்ட ஆரம்ப காலகட்ட களச்செயற்பாட்டில் ஈடுபட்டிருந்த வேளை சிறிலங்கா காவல்துறையினரால் சுற்றிவளைக்கப்பட்ட தருணத்தில் சயனைட் அருந்தி 05.06.1974ம் ஆண்டு அன்று வீரச்சாவைத் தழுவிக்கொண்ட 
முதற் தற்கொடையாளர் தியாகி பொன்.சிவகுமாரன் அண்ணா அவர்களின் 45 ஆம் ஆண்டு வீரவணக்க நாள் இன்றாகும்.

""தமிழீன ஒடுக்குமுறைக்கு சிங்களம் வித்திட்டு கல்வி தரப்படுத்தலை வீசியபொழுது அதை எதிர்த்து தமிழினப் புரட்சிக்கு வித்திட்டவர்""

தியாகி பொன் சிவகுமாரன் மறைந்த நாளாகிய ஆனி 5ற்கு மறுநாள் ஆனி 6ஆம் நாள் தமிழீழ மாணவர் எழுச்சி நாளாக பிரகடனப்படுத்தி தாயகம் அடங்கலாக தமிழீழ மக்கள் வாழும் தேசங்கள் எங்கும் தமிழீழ மக்களால் கொண்டாடப்படுகின்றது.

தியாகி பொன்.சிவகுமாரன் சாதிக்க முயற்சித்தவற்றை தமிழீழத் தேசியத்தலைவரும் அவர்தம் தோழர்களும் சாதித்தனர். இன்று அவரின் கனவான தமிழீழத் தாயகத்தை நோக்கி தமிழீழத் தேசியம் வீறுநடைபோடுகின்றது.

-ஈழம் ரஞ்சன்-
Read More

June 01, 2019

நாட்டுப்பற்றாளர் ஐயாத்துரை நடேசன் அவர்களின் 15ம் ஆண்டு நினைவு நாள் இன்றாகும்.
by admin - 0

நாட்டுப்பற்றாளர் ஐயாத்துரை நடேசன் அவர்களின் 15ம் ஆண்டு நினைவு நாள் இன்றாகும்.

2004ஆம் ஆண்டு மே மாதம் 31ஆம் நாள் மட்டக்களப்பில் தனது வீட்டில் இருந்து காலை பணிக்குச் சென்றுகொண்டிருந்தபோது இவர் சுட்டுக்கொல்லப்பட்டிருந்தார். நான்கு பிள்ளைகளின் தந்தையான இவர் படுகொலை செய்யப்பட்டபோது அகவை 50 ஆகும்.

யாழ்ப்பாணம் நெல்லியடியில் பிறந்து வளர்ந்த ஜி.நடேசன் மட்டக்களப்பில் பல ஆண்டுகள் வாழ்ந்ததுடன், தென் தமிழீழ மக்கள் மீதும், அந்த மண் மீதும் அளப்பரிய பற்றுக்கொண்டிருந்தார்.

நீண்ட காலம் ஊடகப் பணி செய்து அனுபவம் பெற்றிருந்த இவர், ஊடகத்துறையில் முழு நேரமாகப் பணியாற்றாது விட்டாலும், ஒரு முழுநேர ஊடகவியலாளன் ஆற்றும் பணிக்கு ஈடாக, அல்லது அதற்கு மேலாகவும் தனது ஊடப்பணியை செவ்வனே ஆற்றி வந்தவர்.

இவரது பணிக்கு சாகித்திய விருது, சிறந்த ஊடகவியலாளர் விருது (2000), ஆளுநர் விருது போன்ற பல்வேறு விருதுகள் வழங்கப்பட்டமை, அவரது ஊடகப் பணிக்கு கிடைத்த சான்றுகளாகும். இவர் படுகொலை செய்யப்பட்ட பின்னர்கூட தனது தலைசிறந்த ஊடகப்பணிக்காக மதிப்பளிக்கப்பட்டவர்.

20 வருடங்களுக்கு மேலாக கொழும்பு வீரகேசரி பத்திரிகையின் செய்தியாளராகவும், ‘நெல்லை நடேசன்’ என்ற பெயரில் பத்தி எழுத்தாளராகவும் இருந்த இவர்,1997ஆம் ஆண்டு முதல் லண்டனை தளமாகக் கொண்டு இயங்கிவரும் ஐ.பி.சி வானொலி, கொழும்பு சக்தி தொலைக்காட்சி உட்பட ஏனைய பல ஊடகங்களுக்கு தனது இறுதி மூச்சுவரை பணியாற்றியவர்.

மட்டக்களப்பு மக்கள் மட்டுமன்றி, இன அழிப்பை அதிகம் எதிர்கொண்ட தென் தமிழீழ மக்கள் மீதான இனப்படுகொலைகள் பற்றிய விபரங்களை விரல் நுனியில் வைத்திருந்த இவர், அந்த மக்கள் நினைவுகூரப்பட வேண்டும் என்பதிலும், அந்தப் படுகொலை பற்றிய விபரங்களை ஏனையவர்கள், குறிப்பாக இளையோர் அறிந்திருக்க வேண்டும் என்பதிலும் கரிசனை கொண்டிருந்தவர்.

இனப் படுகொலைகள் மட்டுமன்றி மட்டக்களப்பு பற்றியும், தென் தமிழீழம் பற்றியும் எப்பொழுது எந்தத் தகவல் கேட்டாலும் உடனே சொல்லும் ஆற்றல் கொண்டிருந்த இவர், சொல்வதுடன் நிறுத்தி விடாது அவற்றை எழுதி தொலைநகலில் அனுப்பியும் வைப்பார். ஏதாவது ஒரு படுகொலை அல்லது முக்கிய விடயங்கள் பற்றி ஊடகங்கள் கேட்க மறந்து விட்டால்கூட அதனை ஞாபகம் ஊட்டி உடனே அனுப்பி வைப்பார். எதனையும் நேருக்கு நேர் பேசும் இவரது நடைமுறை காரணமாக, உண்மையை அல்லது மக்களிற்கு பாதகமான விடயங்களைக் கடியும் இவரது குணாம்சம் காரணமாக, பல தடவைகள் பல்வேறு எதிர்புகளையும், இன்னல்களையும் எதிர்கொண்டவர்.

பல தடவைகள் நேரடியாகவும், தொலைபேசி ஊடகவும் கொலை மிரட்டல், அச்சுறுத்தலுக்கு உள்ளாகியிருந்த போதிலும், ஏன் வீட்டின் மீது குண்டுத் தாக்குதல் (2000ஆம் ஆண்டு) இடம்பெற்ற போதிலும்கூட, அஞ்சாது தனது குடும்பத்துடன் இறுதிவரை மட்டு மண்ணில் இருந்து மக்களிற்காகக் குரல்கொடுத்த ஒரு சிறந்த ஊடகன்.

மட்டக்களப்பில் சிறீலங்கா படையினரது கட்டுப்பாட்டில் இருந்த நகர் பிரதேசத்தல் வாழ்ந்த போதிலும், அவ்வப்பொழுது தமிழீழ விடுதலைப் புலிகளின் நிருவாகக் கட்டமைப்புக்குள் ஏனைய தென் தமிழீழ ஊடகவியலாளர்களுடன் சென்று அங்குள்ள மக்களின் பிரச்சினைகளையும், கஸ்ரங்களையும் வெளிக்கொண்டு வந்தவர்.

பல இக்கட்டான காலங்களில்கூட இவர் போன்ற ஊடகவிலாளர்கள் (தற்பொழுது நாட்டில் வாழ முடியாது புலம்பெயர்ந்துள்ளவர்கள் உட்பட) மக்களிற்காகவும், அவர்களில் நல்வாழ்விற்காகவும், உரிமைகளுக்காவும் ஆற்றிய, ஆற்றிக்கொண்டிருக்கும் பணிகளை புலம்பெயர்ந்த மக்கள் மறந்துவிடக்கூடாது.

நாட்டுப்பற்றாளர் என ஐய்யத்துரை நடேசன் அவர்கள் மதிப்பளிக்கப்பட்டதன் மூலம் அவர் ஆற்றிய பணியை நாம் எடைபோட முடியும்.

ஊடகவியலாளர் நாட்டுப்பற்றாளர் ஜி.நடேசன், மாமனிதர் சிவராம், மயில்வாகன் நிமலராஜன், லசந்த விக்கிரதுங்க என டிச்சர்ட் டி சொய்சா முதல் இன்றுவரை முப்பதிற்கும் மேற்பட்ட ஊடகர்கள் இதுவரை படுகொலை செயப்பட்டுள்ளனர். இவர்களைப் படுகொலை செய்தவர்கள் யார் என்று தெரிந்திருந்தும், அவர்கள் தண்டிக்கப்படவும் இல்லை. இழக்கப்பட்ட உயிர்களுக்கு இதுவரை நீதி கிடைக்கவும் இல்லை.

ஊடகவியலாளர் நாட்டுப்பற்றாளர் ஐயாத்துரை நடேசன் அவர்களுடன் (தொலைபேசி ஊடாக) இணைந்து பணியாற்றியதால் பெற்றுக்கொண்ட அனுபவத்திற்கும், ஊடக அறிவிற்கும் அவரது இந்த நினைவுநாளில் நன்றி தெரிவிக்கும் அதேவேளை, அவரது இழப்பிற்கு நீதி கிடைக்க வேண்டும் என வலியுறுத்தி, என இதயபூர்வ அஞ்சலியை காணிக்கையாக்குகிறேன்.

ஊடகத்துறைக்கு தன்னை அர்ப்பணித்த தந்தையை இழந்து துடிக்கும் நடேசன் அண்ணாவின் பிள்ளைகளுக்கும், கணவனை இழந்து துயரப்படும் அவரது மனைவிக்கும்,மீண்டும் ஒரு தடவை 
ஆழந்த இரங்கலைத் தெரிவித்துக்கொள்ளுகின்றேன்.

நினைவு பகிர்வு 
-பரா பிரபா-
ஊடகவியலாளர்


ஈழம் ரஞ்சன்
Read More

May 31, 2019

தமிழரின் அறிவுப் புதையலான யாழ்.நூலகத்தை தீக்கரையாக்கி 38 ஆண்டுகள் நிறைவு பெற்றுவிட்டன.
by admin - 0

தமிழரின் அறிவுப் புதையலான யாழ்.நூலகத்தை தீக்கரையாக்கி 38 ஆண்டுகள் நிறைவு பெற்றுவிட்டன.
-31/05 -01/06/1981-

யாழ்ப்பாண நகருக்கு பெருமை சேர்க்கும் விடயமாகட்டும்,அழகாய் கூறும் விடயமாகட்டும் எது என்றாலும் எமது பொது நூலகம் தலை நிமிர்ந்து நிக்கிறது. யாழ்பாணம் கல்வி கலாச்சாரத்துக்கு முக்கியமான ஒரு நிலையம் என்றால் அது மிகையாகாது.அதைவிட கலாச்சாரம் இன்று கேள்விகுறியானாலும் சில பல இடங்களில் அது வாழ்ந்து கொண்டு தான் இருக்கிறது. பல ஆர்வலர்களுடைய அயராத உழைப்பினாலும், பொது மக்களினதும், பல உள்நாட்டு, வெளிநாட்டு நிறுவனங்களினதும் தாராளமான ஆதரவினாலும் வளர்ச்சி பெற்றிருந்த எமது பண்பாடு, கலாச்சாரம் என்பவற்றிலும், கல்வியிலும் முக்கியம் வகிக்கும் யாழ் பொது நூலகம் பற்றி ஒரு நோக்கு..
நூலக வரலாறு.
------------------------
இந்த நிறுவனத்துக்கான கருப்பொருள் க.மு. செல்லப்பா என்னும் ஆர்வலரொருவரால் உருவாக்கப்பட்டது. இந்த செல்லப்பா அச்சுவேலியை சேர்ந்தவர், யாழ்ப்பான நீதிமன்றத்தில் கரியதரிசியாக இருந்தவர். அதாவது சக்கடத்தார். நவம்பர் 11. 1933 ஆம் ஆண்டில் தனது வீட்டில், சில நூல்களுடன் இவர் நடத்திவந்த நூல் நிலையமே இன்று விசாலமாக வளந்துள்ளது.இதனைப் பலருக்கும் பயன்படும் வகையில் விரிவுபடுத்தும் நோக்கில், 1934ஆம் ஆண்டு ஆனி மாதம் 9ஆம் திகதி ஐசாக் தம்பையா அவர்களின் தலைமையில் யாழ்ப்பாணம் மத்திய கல்லூரி மண்டபத்தில் நடைபெற்ற கூட்டம் ஒன்றே பொது நூலகத்தின் தோற்றத்திற்கு அடிகோலியது. இக்கூட்டக் காரியதரிசி திரு. க. மு. செல்லப்பா அவர்கள் சிரமப்பட்டுத் திரட்டிய 184 ரூபா 22சதம் தான் முன்னோடியான பொது நூலகம் ஒன்றிற்கான மூலதனமாய் அமைந்தது. அன்றைய காலத்தில் அது ஒரு பெரிய மூலதனம் தான்.இதன் வழி ஆஸ்பத்திரி வீதியில் வாடக அறை ஒன்றில் 844 நூல்களுடனும் 36 பருவ வெளியீடுகளுடனும், 1934 ஆம் ஆண்டு ஆவணி மாதம் 1ஆம் திகதி ஆரம்பிக்கப்பட்ட சிறியதொரு பொது நூலகம் வசதியின்றி இடர்ப்பட்ட போது அதனை யாழ்ப்பாணப் பட்டின சபை பொறுப்பேற்று 1-1-1935 இல் வாடி வீட்டிற்குத் தெர்கிலுள்ள மேல் மாடிக்கு இடமாற்றஞ் செய்யப்பட்டு, அங்கே இயங்கி வந்தது.
சகல வசதிகளையும் கொண்ட நவீன பொது நூலகக் கட்டிடம் ஒன்றினை அமைப்பதற்கான முயற்சிகள் 1952ஆம் ஆண்டு ஆனி மாதம் 14ஆம் திகதி சாம் ஏ. சபாபதி அவர்களின் தலைமையில், நடைபெற்ற ஒரு மகாநாட்டினை அடுத்து ஆரம்பிக்கப்பட்டன. புதிய நூலகக் கட்டிடடத்தை அமைப்பதில் அதி வண பிதா லோங் அவர்கள் மிகுந்த அக்கறை காட்டி வந்தார். அவர்களது முயற்சியின் மூலம் நூலகத் துறையில் நிபுணத்துவம் வாய்ந்த கலாநிதி எஸ். ஆர். ரங்கநாதன் அவர்களின் ஆதரவும் கிடைத்தது.
நூலகத்தின் அமைப்பிற்கான திட்டங்களை வகுத்துக் கொடுக்க சென்னை அரசின் கட்டிடக் கலை நிபுணர் கே. எஸ். நரசிம்மன் அவர்கள் வந்து வரைபடங்களைத் தயாரித்து உதவினார். கட்டிட அடிக்கல்நாட்டு விழா 1953ஆம் ஆண்டு பங்குனி மாதம் 29ஆம் திகதி நடைபெற்றது. திராவிடக் கலயம்சம் பொருந்திய எழில் மிகு அறிவுக் கோயில் ஒன்று வெகு பொது மக்களின் நிறைவான ஆதரவுடன் உருப்பெற ஆரம்பித்தது.
பொது நூலகத்தின் முதற்கட்டம் பூர்த்தி செய்யப்பட்டு 11.10.59இல் அதி விமரிசையாக அப்போது யாழ்முதல்வராக இருந்த முதல்வர் அ.த.துரையப்பா அவர்களால் திறந்து வைக்கப்பட்டது. இதனைத் தொடர்ந்து நூலகத்தின் ஏனைய கட்டடடங்களும் பூர்த்தி செய்யப்பட்டன. பூரணத்துவம் பெற்று இயங்கி வந்த இந்நூலகத்தில் நூலகர் நூலகர் உட்பட 33 பேர் கடமையாற்றி வந்தார்கள்.
பொது நூலகம் எரிப்பு.
......................................
யாழ்ப்பாணம் பொது நூலகம் எரிப்பு என்பது இலங்கை இனப்பிரச்சினையில் ஒரு முக்கிய நிகழ்வாகும். இந்நிகழ்வு 1981 ஆம் ஆண்டு மே 31 ஆம் திகதி நள்ளிரவுக்கு பின்னர் வன்முறைக் குழுவொன்றால் இடம்பெற்றது. இது 20ம் நூற்றாண்டின் இன, நூலழிப்புகளில் ஒரு மிகப்பெரும் வன்முறையாகக் கருதப்படுகிறது. இவ்வழிப்பு நேர்ந்த காலகட்டத்தில் யாழ்ப்பாணப் பொது நூலகம் கிட்டத்தட்ட 97,000 அரிய நூல்களுடன் தென்கிழக்காசியாவிலேயே மிகப்பெரிய நூலகமாகத் திகழ்ந்தது. நூலகம் எரிக்கப்பட்டது தமிழ் மக்கள் மத்தியில் அழியா காயம் ஒன்றை ஏற்படுத்தி விட்டது.நூலகம் எரியும் செய்தியை கேட்டு சென் பற்றிக்ஸ் ஆசிரியரும் புலவருமான சங். பித கலாநிதி டேவிட் அவர்கள் மனவதிர்ச்சியில் தம் உயிரை நீத்தார்.
1981 ஆம் ஆண்டு அழிக்கப்பட்ட பொது நூலகத்தை திருத்தாது யாழ் மாநகரசபை அதை ஒரு அழிப்பின் சின்னமாக வைத்திருந்தது. அதன் பின் பக்கத்தில் ஒரு புதுக்கட்டிடத்தை முன்னிருந்த கட்டிடத்தைப் போல் கட்டுவதற்கு தீர்மானித்தது. இப்பணிக்க முழுநேர பொறியிலராக நியமிக்கப்பட்டவர் பொறியியலாளர் திரு ந. நடேசன் ஆவார். அக்கட்டிடத்தின் கட்டிடக் கலைஞராக நியமிக்கப்பட்டவர் திரு.வி.எஸ்.துரைராஜா ஆவார்.1984 ஆம் ஆண்டு யூன் மாதம் அக்கட்டிட வேலைகள் முடிந்தன. குறைந்தளவான நூற்தொகுதிகளுடன் நூலகம் மீள் ஆரம்பிக்கப்பட்டது. ஆனால் 1988 ஆம் ஆண்டு ஆரம்பித்த யுத்தத்தில் புதிய கட்டிடமும், ஏற்கனவே எரிக்கப்பட்ட கட்டிடமும் பாரிய சேதத்துக்குள்ளாயின.
பதின்னான்கு ஆண்டுகளின் பின் 1999 ஆம் ஆண்டு கட்டிடத்தைப் புனரமைக்கத் தீர்மானிக்கப்பட்டு மீண்டும் வி.எஸ்.துரைராஜா அவர்களை நியமித்து. முன்பிருந்த கட்டிடம் போல அமைக்க இடிந்த பாகங்களைத் தேடி அவைகளைப் படமெடுத்து, வரைந்து கட்டிடத் தோற்றத்தை அமைத்தார் இவர்.
யாழ்ப்பாணம் பொது நூலகம் எரிப்பு என்பது இலங்கை இனப்பிரச்சினையில் ஒரு முக்கிய நிகழ்வாகும். இந்நிகழ்வு 1981 ஆம் ஆண்டு மே 31 ஆம் திகதி நள்ளிரவுக்கு பின்னர் சிங்கள அரசபடைக் குழுவொன்றால் இடம்பெற்றது.இது 20ம் நூற்றாண்டின் இன, நூலழிப்புகளில் ஒரு மிகப்பெரும் வன்முறையாகக் கருதப்படுகிறது. இவ்வழிப்பு நேர்ந்த காலகட்டத்தில் யாழ்ப்பாணப் பொது நூலகம் கிட்டத்தட்ட 97,000 அரிய நூல்களுடன் தென்கிழக்காசியாவிலேயே மிகப்பெரிய நூலகமாகத் திகழ்ந்தது. இந்த நூலக எரிப்பு வன்கும்பலில் இலங்கையின் அமைச்சர் காமினி திசாநாயக்கா உட்பட வேறு பல அப்போதைய சிங்கள அரசியல் தலைவர்கள் அடங்கியிருந்தனர்.
நூலகம் எரிக்கப்பட்டது ஈழத் தமிழ் மக்கள் மத்தியில் அழியா காயம் ஒன்றை ஏற்படுத்தி, தமிழ்த் தேசியப் போக்குக்கு உரம் ஊட்டியது. யாழ் நூலகம் 1933 ஆம் ஆண்டில் இருந்து கட்டியெழுப்பப்பட்டு வந்துள்ளது. முதலில் சிலரது தனிப்பட்ட சேகரிப்புகளுடன் நூலகம் ஆரம்பிக்கப்பட்டு,
மிக விரைவில் உள்ளூர் தமிழ் மக்களின் ஆதரவுடன் ஒரு முழு நூலகமானது.யாழ்ப்பாணத்தின் பல இடங்களிலும் தனிப்பட்டவர்களிடம் இருந்து வந்த பல நூல்கள், குறிப்பாக நூற்றாண்டுகள் பழமையான ஓலைச்சுவடிகள் 1800களில் யாழ்ப்பாணத்தில் வெளியிடப்பட்ட பல பத்திரிகைகளின் மூலப் பிரதிகள் போன்றவை இந்நூல்நிலையத்தில் வைக்கப்பட்டிருந்தன நூலகத்தின் முதலாவது கட்டடம் 1959 ஆம் ஆண்டு திறந்து வைக்கப்பட்டது.

புத்தரின் படுகொலை
நேற்று என் கனவில்
புத்தபெருமான் சுடப்பட்டிறந்தார்.
சிவில் உடை அணிந்த
அரச காவலர் அவரைக்கொன்றனர்.
யாழ் நுலகத்தின் படிக்கட்டருகே
அவரது சடலம் குருதியில் கிடந்தது!
இரவின் இருளில் அமைச்சர்கள் வந்தனர்.
"எங்கள் பட்டியலில் இவர் பெயர் இல்லை
பின் ஏன் கொன்றீர்?"
என்று சினந்தனர்
"இல்லை ஐயா
தவறுகள் எவையும் நிகழவே இல்லை
இவரைச்சுடாமல்
ஓர் ஈயினைக்கூடச்
சுடமுயாது போயிற்று எம்மால்
ஆகையால்த்தான்"
என்றனர் அவர்கள்
"சரி சரி
உடனே மறையுங்கள் பிணத்தை"
என்று கூறி அமைச்சர்கள் மறைந்தனர்.
சிவில் உடையாளர்
பிணத்தை உள்ளே இழுத்துச்சென்றனர்
தொண்ணுறாயிறம் புத்தகங்களினால்
புத்தரின் மேனியை மூடி மறைத்தனர்.
சிகாலோகவாத சூத்திரத்தினைக் கொழுத்தி
எரித்தனர்
புத்தரின் சடலம் அஸ்த்தியானது
தம்ம பதமும்தான் சாம்பரானது

கவிஞர் எம்.ஏ.நுஃமான்யாழ் பொது நூலகம் எரிக்கப்பட்ட போது..



ஈழம் ரஞ்சன்
Read More

May 20, 2019

சமர்க்கள நாயகன் பிரிகேடியர் பால்ராஜ் அண்ணா அவர்களின் 11ம் ஆண்டு வீரவணக்க நாள் இன்றாகும்
by admin - 0

சமர்க்கள நாயகன் பிரிகேடியர் பால்ராஜ் அண்ணா அவர்களின் 11ம் ஆண்டு வீரவணக்க நாள் இன்றாகும்.



தமிழீழ விடுதலைப் புலிகளின் மூத்த தளபதிகளில் ஒருவரும், சமர்க்களங்களின் நாயகனுமான பிரிகேடியர் பால்ராஜ், எதிரிக்கு போர்முனைகளில் சிம்ம சொர்ப்பனமாக விளங்கினார்.தமிழீழத்தின் இதய பூமியான கொக்குத்தொடுவாயைச் சேர்ந்த பிரிகேடியர் பால்ராஜ், 1983ம் ஆண்டு தமிழீழ விடுதலைப் புலிகள் இயக்கத்தில் இணைந்து கொண்டார்.

வன்னியில் மேஜர் பசீலனுடன் இணைந்து எதிரிகளுக்கு எதிரான தாக்குதல்களை நடத்தினார். இந்தியப்படை வல்வளைப்புக் காலத்தில் வன்னியில் செயற்பட்ட இவர், மேஜர் பசீலனுடன் தமிழீழத் தேசியத் தலைவர் அவர்கள் இருந்த மணலாறு மண்ணில் இருந்தபோது அவர்களைப் பாதுகாக்கும் செயற்பாட்டில் மேஜர் பசீலனுடனும் தொடர்ந்து லெப்.கேணல் நவத்துடனும் செயற்பட்டார்.

இந்தியப்படை வெளியேற்றத்தின் பின்னர் வன்னிக்கான தளபதியாகி வன்னியில் தடைக்கற்களாக இருந்த சிங்களப் படைத்தளங்களை துடைத்தழிக்கும் நடவடிக்கையில் ஈடுபட்டார்.

1990 ஆம் ஆண்டில் கொக்காவில் மாங்குளம் கிளிநொச்சி ஆகிய வன்னியின் நடுப்பகுதியில் இருந்த சிங்களப் படைத்தளங்களை இவர் நடத்திய தாக்குதல் நடவடிக்கைகள் மூலம் தகர்த்தழிக்கப்பட்டன.முல்லைத்தீவை விரிவாக்கும் சிறிலங்காப் படையினரின் கடற்காற்று எதிர் நடவடிக்கையையும் தலைமையேற்று வழிநடத்தினார்.

தமிழீழத் தேசியத் தலைவர் அவர்களால் உருவாக்கப்பட்ட முதல் சிறப்புப் படையணியான சார்ள்ஸ் அன்ரனியின் முதலாவது சிறப்புத் தளபதியாக இவர் நியமிக்கப்பட்டார்.

வவுனியாவிலிருந்து சிறிலங்காப் படைகள் மேற்கொண்ட வன்னிவிக்கிரம நடவடிக்கையை முறியடித்து எதிரியின் உலங்குவானூர்தியைச் சுட்டுவீழ்த்தி எதிரிக்குப் பேரிழப்பை ஏற்படுத்திய சார்ள்ஸ் அன்ரனி சிறப்புப்படையணியின் தாக்குதல்களை வழிநடத்தினார்.

1991 ஆம் ஆண்டு ஆனையிறவுப் படைத்தளம் மீதான ஆகாய- கடல்வெளிச் சமரில் வன்னிப்பகுதி ஊடாக நகர்ந்து சுற்றுலா விடுதி படைமுகாம் தகர்ப்பு நடவடிக்கை இவர் தலைமையில் நடத்தப்பட்டது.

மணலாறில் சிறிலங்காப் படைகள் மேற்கொண்ட மின்னல் நடவடிக்கை முறியடிப்புத் தாக்குதலையும் வழி நடத்தியிருந்தார். இதன் பின்னர் தமிழீழ விடுதலைப் புலிகளின் துணைத் தளபதியாக நியமிக்கப்பட்டார்.

யாழ்ப்பாணத்துக்கான ஒரே பாதையான கிளாலிப் பாதையை சிங்களப் படைகள் மூடிவிடும் நோக்கத்தில் மேற்கொண்ட யாழ்தேவி நடவடிக்கையை முறியடித்து எதிரிகளின் டாங்கிகளை முதல் தடவையாக அழித்த நடவடிக்கையில் காலில் காயமடைந்தார்.

1995 ஆம் ஆண்டில் சிறிலங்காப் படையினர் யாழ்ப்பாணத்தில் மேற்கொண்ட முன்னேறிப்பாய்தல் முறியடிப்புத் தாக்குதலான புலிப்பாய்ச்சலில் அணிகளை களத்தில் வழிநடத்தி எதிரிக்குப் பலத்த இழப்புக்களை ஏற்படுத்த அந்த நடவடிக்கை முறியடிக்கப்பட்டதில் பங்காற்றினார்.

யாழ்ப்பாணத்தினை சிறிலங்காப் படைகள் வல்வளைத்த சூரியக்கதிர் நடவடிக்கை எதிர்தாக்குதலில் பங்காற்றிய இவர், 1996 ஆம் ஆண்டில் விடுதலைப் போராட்டத்திற்கு பெரும்பலம் சேர்த்து எதிரிக்குப் பேரழிவை ஏற்படுத்திய முல்லைத்தீவு படைத்தளம் அழிக்கப்பட்ட ஓயாத அலைகள் - 01 நடவடிக்கையின் ஒருங்கிணைப்புத் தளபதியாக செயற்பட்டார்.

வன்னியை சிறிலங்காப் படையினர் வல்வளைத்த ஜெயசிக்குறு நடவடிக்கை எதிர் நடவடிக்கையில் தொடக்க காலத்தில் செயற்பட்ட இவர், பின்னர் கிளிநொச்சியில் இருந்த சிங்களப் படையினர் விரட்டியடிக்கப்பட்ட ஓயாத அலைகள்- 02″ நடவடிக்கையின் வெற்றிக்கு உறுதுணையாக ஊடறுப்புத் தாக்குதலை வெற்றிகரமாக நடத்தினார்.

தொடர்ந்து ஓயாத அலைகள் -03″ நடவடிக்கையில் சிங்களத்தின் மிகப்பெரும் தளமான ஆனையிறவை வெற்றி கொள்வதற்காக எதிரியின் கோட்டையான குடாரப்பில் பெரும் அணிக்கு தலைமையேற்று கடல்வழியாகச் சென்று தரையிறங்கி, இத்தாவிலில் ஊடறுத்து 34 நாட்கள் எதிரியின் முற்றுகைக்குள் நின்று எதிரிகளுக்குப் பெரும் இழப்புக்களை ஏற்படுத்தி ஆனையிறவு வெற்றிக்கு உறுதுணையாக நின்றார்.அப்போது சிங்களப் படை மாறி மாறி 4 தளபதிகளை தனது சிறப்புப்படைக் கொமாண்டோக்களுக்கு நியமித்து பெரும் தாக்குதல்களை நடத்திய போதும், ஆனையிறவு வெல்லப்பட்டு பளையைக் கைப்பற்றி விடுதலைப் புலிகள் வந்து கைகுலுக்கும் வரை இத்தாவிலில் எதிரியை திணறடித்தவர் இவர்.

2001 ஆம் ஆண்டில் முகமாலையில் இருந்து எதிரி மேற்கொண்ட தீச்சுவாலை: என்ற பெரும் தாக்குதலையும் முறியடித்ததில் முதன்மைப் பங்கை வகித்திருந்தார்.

போர் நிறுத்த காலத்தில் மட்டக்களப்பின் வாகரைப் பகுதியில் நின்று செயற்பட்ட இவர், அங்கு ஆழிப்பேரலையில் அகப்பட்டு தப்பினார். பின்னர் வன்னிக்குத் திரும்பிய இவர், போராளிகளுக்கு பயிற்சி கொடுத்து வளர்த்தல் மற்றும் போரியல் உத்திகளை கற்றுக்கொடுத்தல் ஆகிய முதன்மைச் செயற்பாடுகளில் ஈடுபட்டார்.

அமைதிக்காலத்தில் நோய்க்காக சிகிச்சை பெற சிங்கப்பூர் சென்றிருந்தார். போராளிகளினதும் மக்களினதும் அன்பையும் மதிப்பையும் பெற்றவராக எதிரிக்கு சிம்ம சொப்பனமாக இருந்த பிரிகேடியர் பால்ராஜின் இழப்பில் உலகத்தமிழினம் துயருற்று இருக்கின்றது.
- ஈழம் ரஞ்சன் -
Read More

May 19, 2019

பிரித்தானியாவில் பெருமளவு மக்கள் கலந்துகொண்ட முள்ளிவாய்க்கால் நினைவு நிகழ்வுகள்
by admin - 0

பிரித்தானியாவில் பெருமளவு மக்கள் கலந்துகொண்ட முள்ளிவாய்க்கால் நினைவு நிகழ்வுகள்






















முள்ளிவாய்க்கால் தமிழினப் படுகொலையின் 10 ஆம் ஆண்டு நினைவேந்தல் நிகழ்வு பிரித்தானியாவில் பேரணியாகச் சென்று நினைவேந்தப்பட்டது


Read More

May 11, 2019

நா.க.த.அரசாங்கத்தின் தேர்தல் முடிவுகள் - பிரித்தானியா....! TGTE ELECTION RESULTS 2019
by admin - 0

நாடு கடந்த தமிழீழ அரசாங்கத்தின் 3ஆவது பொதுத்தேர்தலானது 27/04/2019 சனிக்கிழமையன்று நடைபெற்றது. இங்கிலாந்தில் 18 பாராளுமன்ற உறுப்பினர்களை தேர்வு செய்வதற்க்கு 29 வேட்பாளர்கள் போட்டியிட்டனர்.



வாக்குச்சாவடி


வாக்குச் சாவடிகளில் வாக்களிக்கப்பட்ட வாக்குகள் 27/04/2019 அன்று எண்ணப்பட்டும் தபால் மூல வாக்குகள் 06/05/2019 அன்றும் 10/05/2019 அன்றும் எண்ணப்பட்டு 10/05/2019 அன்று தேர்தலின் முடிவுகள் நாடு கடந்த தமிழீழ அரசாங்கத்தின் தேர்தல் ஆணையகத்தினால் அறிவிக்கப்பட்டது. அத்துடன் 18ஆவதாக வெற்றி பெற்றவரின் பெயர் பின்னர் அறிவிக்கப்படும் எனவும் அறிவிக்கப்பட்டுள்ளது. அத்துடன் இதில் போட்டியிட்ட வேட்பாளர்களில் இளம் வேட்பாளர்கள் அதிக எண்ணிக்கையில் வெற்றி பெற்றுள்ளமை குறிப்பிடத்தக்கது 







Read More