பொது மக்கள் தமது எதிர்காலம் தொடர்பாக அச்சப்பட வேண்டிய தேவையில்லை எனத் தெரிவித்த பிரதமர் ரணில் விக்கிரமசிங்க எதிர்வரும் 60 தினங்களுக்குள் இயல்பு நிலை ஏற்படுத்தப்படும் எனவும் நம்பிக்கை வெளியிட்டார்.
குறித்த சம்பவம் தொடர்பாக பூரணமான அறிக்கையொன்று பாராளுமன்றத்திற்கு சமர்ப்பிக்கப்படுமெனவும் பிரதமர் உறுதிப்படத் தெரிவித்தார்.
பாராளுமன்றத்தில் நேற்று வெள்ளிக்கிழமை நிலையியற் கட்டளை 23 இன் கீழ் இரண்டு பிரிவின் கீழ் விசேட கூற்றொன்றை எதிர்க்கட்சியின் பிரதம கொறடாவும் ஜே.வி.பி. யின் தலைவருமான அநுர குமார திஸாநாயக்க எம்.பி. முன்வைத்தபோதே அதற்கு பதிலளிக்குமுகமாக அவர் மேற்கண்டவாறு குறிப்பிட்டார்.
அனுர குமார குறிப்பிடுகையில் அண்மையில் கொஸ்கம சாலாவ இராணுவ முகாமில் ஏற்பட்ட திடீர் தீ விபத்தால் ஏற்பட்ட வெடிப்பின் காரணமாக பாரியளவிலான சேதங்கள் ஏற்பட்டுள்ளன. பொது மக்களும் இடம்பெயர்ந்துள்ளனர். பலரின் வீடுகள் முழுமையாகவும் பகுதியளவிலும் சேதமடைந்துள்ளன. பொது மக்களின் பொட்கள் களவாடப்படுகின்றன. இழப்பீடுகள் தொடர்பான மதிப்பீடுகள் நடைபெறுகின்றனவா? பொது மக்களின் அச்ச மனநிலையை போக்குவதற்கும் இயல்பு நிலையை மேற்கொள்வதற்கும் எவ்வாறான நடவடிக்கைகள் முன்னெடுக்கப்படுகின்றன என கேள்வியெழுப்பினார்.
இதற்கு பதிலளித்த ஸ்ரீலங்கா பிரதமர் ரணில் விக்கிரமசிங்க குறிப்பிடுகையில்;
இந்த சம்பவம் இடம்பெற்றது முதல் நானும் ஜனாதிபதியும் அது குறித்த விசேட நடவடிக்கைகளை எடுத்து வருகின்றோம். அப்பகுதிக்கு உடனடியாக நானும் அமைச்சர்களான அநுர பிரியதர்ஷன யாப்பா, சுசில் பிரேம்ஜெயந்த, சாகல ரட்நாயக்க மற்றும் தினேஷ் குணவர்தன எம்.பி. ஆகியோர் விஜயம் செய்து பார்வையிட்டதோடு உரிய நடவடிக்கைகளை எடுப்பதற்கான பணிப்புரைகளும் விடுக்கப்பட்டுள்ளன. குறித்த சம்பவம் தொடர்பான விசாரணை அறிக்கையும் கோரப்பட்டுள்ளது.
குறிப்பாக சம்பவம் இடம்பெற்ற பகுதி யுத்த களம் போன்றுதான் காணப்படுகின்றது. தொடர்ந்தும் வெடிக்காத பொருட்கள் அங்காங்கேயிருந்து வெடிப்பதற்கான வாய்ப்புக்கள் உள்ளன. தொடர்ச்சியாக வெடிப்புச் சம்பவம் இடம்பெற்ற பகுதியை சுத்தப்படுத்தும் செயற்பாடுகள் முன்னெடுக்கப்படுகின்றபோது பாதுகாப்புக் காரணங்களுக்காக பொது மக்களை அனுமதிப்பது தவிர்க்கப்பட்டுள்ளது.
பொது மக்களின் தேவைகளை நிறைவேற்றுவதற்கு நடவடிக்கைகள் முன்னெடுக்கப்படுகின்றன. சம்பவம் இடம்பெற்றவுடன் குறித்த பகுதிக்கு தேவையான அடிப்படை வசதிகளை உரிய அமைச்சர்கள் ஊடாக பெற்றுக் கொடுக்கப்பட்டுள்ளன. அத்துடன் அப்பிரதேசத்தை மீள புனரமைப்பதற்காக தேவையான நிதியை வழங்குவதற்கு திறைசேரிக்கு உரிய பணிப்புரைகள் விடுக்கப்பட்டுள்ளன.
தற்போது வரையில் 11 வீடுகளை மீளப்புனரமைக்கும் செயற்பாட்டை இராணுவத்தினர் நிறைவு செய்துள்ளனர். அடுத்து 72 மணித்தியாலங்களினுள் சிறு சேதமடைந்த வீடுகளின் திருத்தப் பணிகளை நிறைவு செய்வதற்கு நடவடிக்கைகள் எடுக்கப்பட்டுள்ளன. எதிர்வரும் 60 நாட்களுக்குள் அப்பகுதியில் சேதமடைந்த வீடுகள் புனரமைக்கப்பட்டு இயல்பு நிலை உருவாக்கப்படும். 125 கிணறுகள் தற்போது வரையில் சுத்தம் செய்யப்பட்டுள்ளன. அசுத்தமடைந்த குடிநீர் கிணறுகளை பயன்படுத்தும் வரையில் மாற்று நடவடிக்கைகள் எடுக்கப்பட்டுள்ளன.
அத்துடன் மூன்று காலாட்படை பிரிவினர் சுத்திகரிக்கும் செயற்பாடுகளில் ஈடுபட்டுள்ளனர். மேலும் இராணுவத்தினர் தேவையேற்படின் அதனை வழங்குவதற்குரிய நடவடிக்கைகளும் எடுக்கப்பட்டுள்ளன. மேலும் குறித்த சம்பவம் தொடர்பில் விசாரணை அறிக்கையொன்றும் கோரப்பட்டுள்ளது. குறித்த அறிக்கை கிடைக்கப் பெற்றதும் பாராளுமன்றத்தில் அவ்வறிக்கை சமர்ப்பிக்கப்படும்.
அத்தோடு வீடுகள் முற்றாக சேதமடைந்த அனைவருக்கும் மூன்று மாத காலத்திற்கு தலா 50 ஆயிரம் ரூபா வழங்கப்படவுள்ளது. வர்த்தக நிலையங்களை மீள இயங்க வைப்பதற்கும் புனரமைப்பதற்குரிய நடவடிக்கைகள் எடுக்கப்பட்டுள்ளன. மின்சாரம் உட்பட அனைத்து விடயங்களும் எதிர்வரும் சில நாட்களில் வழங்கப்படவுள்ளன.
வீடுகளை புனரமைப்பதற்கு தேவையான உதவிகளை இராணுவத்தினர் வழங்குவற்கு தயாராகவுள்ளனர். குறித்த பகுதியில் இயல்பு நிலை விரைவில் உருவாக்கப்படும். அதேவேளை தற்போது இராணுவத்தினருக்கும் பொது மக்களுக்கும் இடையில் முறுகல் நிலையை ஏற்படுத்துவதற்கு சிலர் முயற்சி செய்கின்றனர். 1980 ஆம் ஆண்டு நான் பாகிஸ்தானுக்குச் சென்றிருந்த போது ராவல்பிண்டியிலிருந்த இராணுவ முகாமில் திடீர் வெடிப்பு ஏற்பட்டு மூன்று நான்கு நாட்களாகஇடம்பெற்றது.
இது எதிர்பாராதவொரு சம்பவம். அது தொடர்பில் தவறான கருத்துக்கள் பொது மக்கள் மத்தியில் பரப்பப்படுகின்றன. புலிகள் மீண்டும் வந்து 300 பேரை கொன்றதாக கூட கூறுகின்றனர். அவைகள் அனைத்தும் பொய்ப்பிரசாரமாகும். இராணுவத்தினர் பொது மக்களின் பாதுகாப்பினை உறுதிப்படுத்துபவர்கள். அவர்கள் தொடர்பாக தவறான கருத்துக்களை பரப்பி முறுகல் நிலைமையை ஏற்படுத்த முயல வேண்டாம் எனக்கோருகின்றேன் என்றார் ஸ்ரீலங்கா பிரதமர்
No comments
Post a Comment