அது கடந்த ஏப்ரல் மாதம் 25 ஆம் திகதி சனிக்கிழமை. அம்பாந்தோட்டை மாவட்டத்தின் ஸ்ரீலங்கா சுதந்திரக்கட்சியின் பொதுக்கூட்டம் அன்றைய தினம் கூட்டப்பட்டது. அம்பாந்தோட்டை மாவட்டத்தின் அங்குணுகொல பெலஸ்ஸவில் உள்ள கோட்டையிலேயே இந்த கூட்டம் நடைபெற்றது. இந்த கூட்டத்தின் பிரதானி அல்லது தலைவர் ஸ்ரீலங்கா சுதந்திரக்கட்சியின் தலைவர் ஜனாதிபதி மைத்திரிபால சிறிசேன. இந்நிலையில் ஸ்ரீலங்கா சுதந்திரக்கட்சியின் பல்வேறு உறுப்பினர்களும் அன்றைய தினம் அங்குணுகொல பெலஸ்ஸவை அடையலாயினர்.
ஜனாதிபதி, பாராளுமன்ற உறுப்பினர்கள் என்ற சிறப்பு பிரமுகர்கள் கலந்து கொள்ளும் நிலையில் அங்குணுகொலபெலஸ்ஸ கோட்டையின் பாதுகாப்பு தொடர்பில் நான் சொல்ல வேண்டியதில்லை.
அப்போது முற்பகல் 10.30 மணியிருக்கும் ஏனைய பிரமுகர்களை போன்றே பாராளுமன்ற உறுப்பினர்கள் நாமல் ராஜபக் ஷவும் அந்த கூட்டத்திற்கு வருகை தரலானார். நாமல் ராஜபக் ஷ பாராளுமன்ற உறுப்பினர் அந்த கூட்டத்துக்கு வரும் அந்த சந்தர்ப்பத்திலும் அங்கு மூன்று வரிசைகளை கொண்ட சோதனை சாவடிகளில் சோதனை ஆரம்பிக்கப்பட்டிருந்துள்ளன. உள்ளே
செல்ல மக்கள் நிரம்பியிருந்த நிலையில் பாதுகாப்பு சோதனைகளுக்கு அவர்கள் முகம் கொடுத்திருந்தனர்.
இந்நிலையில் தான் கூட்டத்திற்கு வந்த பாராளுமன்ற உறுப்பினர் நாமல் ராஜபக் ஷ சோதனை சாவடியை கடந்து ஓரிரு அடிகள் முன்னோக்கி நகரும் போது ஜனாதிபதி பாதுகாப்பு பிரிவின் உதவி பொலிஸ் அத்தியட்சரான மல்வலகேயை கண்டு உரையாடியுள்ளார். உதவி பொலிஸ் அத்தியட்சர் மல்வலகேயை ஏற்கனவே அறிந்திருந்ததாலோ என்னவோ நாமல்ராஜபக் ஷ உரையாடலை மேற்கொண்டுள்ளார். உதவி பொலிஸ் அத்தியட்சர் மல்வலகே ஏற்கனவே முன்னாள் ஜனாதிபதி மஹிந்த ராஜபக் ஷவின் பாதுகாப்பு பிரிவிலும் கடமையாற்றி இருந்த நிலையிலேயே தற்போது ஜனாதிபதி மைத்திரிபால சிறிசேனவின் பாதுகாப்பு பணிகளிலும் ஈடுபட்டு வந்தார்.
இந்நிலையில் பழைய அறிமுகத்தாலோ என்னவோ நாமல் ராஜபக் ஷ உதவி பொலிஸ் அத்தியட்சர் மல்வலகேயுடன் உரையாடியுள்ளதாக அறிய முடிகின்றது.
நாமல்: இந்த இடத்திலா டியூட்டி (கடமை)?
மல்வலகே: ஆம்
நாமல்: இவரையும் உள்ளே செல்ல அனுமதியுங்கள் என்று கூறியவாறு நபர் ஒருவரை நாமல் ராஜபக் ஷ காட்டியுள்ளார்.
அவர் வேறு யாருமல்ல நாமல் ராஜபக் ஷவுடன் வந்த முன்னாள் ஜனாதிபதி மஹிந்த ராஜபக் ஷவின் பாதுகாப்பு படையணியில் கடமையாற்றிய இராணுவத்தின் 4 ஆம் ரெஜிமன்ட்டை சேர்ந்த கொமாண்டோ படை வீரரான கோப்ரல் சேனக குமார. நாமலின் வேண்டுகோளுக்கு அமைவாக கோப்ரல் சேனக குமாரவை அழைத்த உதவி பொலிஸ் அத்தியட்சர் மல்வலகே அவரிடம்"ஆயுதம் ஏதும் உடன் வைத்துள்ளீரா? என வினவினார்.
இதற்கு கோப்ரல் சேனககுமார இல்லை என பதிலளிக்கவே உதவி பொலிஸ் அத்தியட்சர் மல்வலகே அவரை உடல் சோதனைகளுக்கு உட்படுத்தாது உள்ளே செல்ல அனுமதித்துள்ளார்.
இந்நிலையில் தான் கூட்டம் ஆரம்பித்த போது ஜனாதிபதியின் மெய்ப்பாதுகாப்பு பணியில் ஈடுபட்டிருந்த பொலிஸ் விசேட அதிரடிப்படை வீரர் ஒருவர் கோப்ரல் சேனக குமாரவின் உடலில் பின்பக்கம் இடது புறத்தே காற்சட்டை பையானது சாதாரணமாக இல்லாமல் புடைத்திருப்பது தெரிந்துள்ளது. இது தொடர்பில் அந்த பொலிஸ் விசேட அதிரடிப்படை வீரர் தனக்கு அருகில் இருந்த மற்றொரு அதிரடிப்படையின் வீரருக்கு விடயத்தை கூறி கோப்ரல் சேனக குமாரவை விசாரித்துள்ளார்.
அந்த கோப்ரல் சேனக குமாரவிடம் பொலிஸ் விஷேட அதிரடிப்படையினர் நீர் யார் ? என கேள்வி எழுப்பியுள்ளனர். அதற்கு அந்த கோப்ரல் நான் பாராளுமன்ற உறுப்பினர் நாமல் ராஜபக் ஷவுடன் கூட்டத்திற்கு வந்ததாகவும் அவரது பாதுகாப்பு தொடர்பிலேயே வந்ததாகவும் கூறியுள்ளார்.
இதன்போது கோப்ரல் சேனக குமாரவின் வலது புற இடுப்புப் பகுதியும் சற்று புடைத்திருப்பதை அவதானித்துள்ள குறித்த விஷேட அதிரடிப்படை வீரர் கோப்ரல் சேனக குமார அணிந்திருந்த சேர்ட்டை சற்று விலக்கி என்ன என்று பார்த்துள்ளார். இதன்போதே இடுப்பின் கைத்துப்பாக்கி ஒன்று இருப்பதை அவர் அவதானித்துள்ளார். இது தொடர்பில் குற்றப் புலனாய்வுப் பிரிவினர் முன்னெடுக்கும் விசாரணைகளில் அதிரடிப்படை வீரர்களால் வாக்கு மூலம் வழங்கப்பட்டுள்ளது.
இவ்வாறு அந்த கோப்ரல் தர வீரர் துப்பாக்கியுடன் கையும் களவுமாக பிடிபடும் போது அவர் கூட்டத்திற்கு வந்திருந்த ஜனாதிபதி மைத்திரிபால சிறிசேனவை நோக்கி முன்னேறியதாகவும் அதனாலேயே பொலிஸ் விஷேட அதிரடிப்படையினர் அவரை விஷேடமாக அவதானித்ததாகவும் அதன் பலனாகவே அவர் சிக்கியதாகவும் கூறப்படுகின்றது.
இந்நிலையில் தான் இடுப்பில் கைத்துப்பாக்கியுடன் இருந்த கோப்ரல் சானக குமார உடனடியாக அங்கிருந்த ஜனாதிபதி பாதுகாப்புப் பிரிவின் சார்ஜன்ட் தர அதிகாரியான நிஸங்கவிடம் ஒப்படைக்கப்பட்டுள்ளார். இந்நிலையில் அந்த கோப்ரலை எவ்வித சோதனைகளுக்கும் உட்படுத்தாது அந்த பாதுகாப்பு அதிகாரி அவரை உடனடியாக நிகழ்வு மண்டபத்திலிருந்து வெளியேற்றியுள்ளார்.
இதுதான் நடந்த சம்பவம். இந்நிலையில் இந்த சம்பவமானது ஊடகங்கள் வாயிலாக பிரசித்தம் செய்யப்படவே ஜனாதிபதி மைத்திரிபால சிறிசேனவின் பாதுகாப்பு குறித்து கேள்விகள் பல எழுப்பப்பட்டன.
இந்நிலையிலேயே உடனடியாக செயற்பட்ட பொலிஸ் மா அதிபர் என்.கே. இலங்ககோன் விசாரணைகளை குற்றப்புலனாய்வுப் பிரிவிற்கு உடன் கையளித்தார். குற்றப் புலனாய்வுப் பிரிவுக்கு பொறுப்பான பிரதிப் பொலிஸ் மா அதிபர் ரவி செனவிரத்ன அதன் பணிப்பாளர் தகஹமுல்ல ஆகியோரின் நேரடி கட்டுப்பாட்டில் இது தொடர்பிலான விசாரணைகள் உதவி பொலிஸ் அத்தியட்சர் சானி அபேசேகர தலைமையிலான சிறப்புக் குழுவிடம் கையளிக்கப்பட்டன.
இந்நிலையில் உதவி பொலிஸ் அத்தியட்சர் சானி அபேசேகர தலைமையிலான பொலிஸ் குழு இந்த விவகாரம் குறித்து மிக சூட்சுமமாக விசாரணைகளை ஆரம்பித்து வாக்கு மூலங்களை பதிவு செய்யும் நடவடிக்கைகளை ஆரம்பித்தது.
இந்நிலையில் தான் கடந்த ஏப்ரல் மாதம் 27ஆம் திகதி திங்களன்று கோப்ரல் சேனக குமார நாமல் ராஜபக் ஷவின் சாரதி ஆகியோர் வாக்கு மூலம் ஒன்றை வழங்க குற்றப் புலனாய்வு பிரிவுக்கு சுயமாக வருகை தந்துள்ளனர்.
இதன்போது குற்றப் புலனாய்வுப் பிரிவினருக்கு வாக்கு மூலம் அளித்துள்ள கோப்ரல் சேனக குமார எனது உத்தியோகபூர்வ கைத்துப்பாக்கியை நான் வாகனத்திலேயே வைத்து விட்டு தான் சென்றேன். வாகனத்தின் 'கெப் ஹோலில்' நான் அதனை வைத்து விட்டுத்தான் சென்றேன் என குறிப்பிட்டுள்ளார். இந்நிலையில் கோப்ரலுடன் வந்த சாரதியும் துப்பாக்கியை கோப்ரல் வாகனத்திலேயே வைத்துச் சென்றதை உறுதி செய்துள்ளார்.
இந்நிலையில் சம்பவம் இடம்பெற்ற போது குறித்த கோப்ரலை பிடித்து ஜனாதிபதி பாதுகாப்பு பிரிவினரிடம் ஒப்படைத்த விஷேட அதிரடிப்படை வீரர் அருகில் இருந்த ஏனைய வீரர்களிடம் வாக்கு மூலங்களை புலனாய்வுப் பிரிவினர் பதிவு செய்தனர்.
இதன்போது வாக்கு மூலமளித்த நான்கு பொலிஸ் விஷேட அதிரடிப்படையினரும் குறித்த கோப்ரலிடம் கைத்துப்பாக்கியொன்று இருந்ததாக வாக்கு மூலமளித்துள்ளனர்.
இந்நிலையில் கோப்ரல் தனது துப்பாக்கியை வாகனத்தில் வைத்து விட்டுச் சென்றிருந்தால் அவரது இடுப்பில் இருந்த துப்பாக்கி யாருடையது என்ற கேள்வி எழுப்பப்பட்டது.
இந்நிலையில் தான் கோப்ரல் சேனக குமாரவை கடந்த மே மாதம் 2 ஆம் திகதி அநாவசியமாக ஆயுதம் ஒன்றை வைத்திருந்தார் என்ற குற்றச்சாட்டின் பேரில் கைது செய்த குற்றப்புலனாய்வுப் பிரிவினர் அன்றைய தினம் இரவோடிரவாக அவரை அங்குணுபொலபெலஸ்ஸ நீதிவான் நயன்த சமரதுங்க முன்னிலையில் ஆஜர்ப்படுத்தி கடந்த 11ஆம் திகதி வரை விளக்கமறியலில் வைத்தனர். அதன் பின்னர் விசாரணைகள் நிறைவு பெறாததை காரணம் காட்டியும் கோப்ரலின் இடுப்பிலிருந்த துப்பாக்கி இன்னும் கண்டுபிடிக்கப்படவில்லை என்பதை காரணம் காட்டியும் அவரை மீண்டும் இம்மாதம் 19ஆம் திகதி வரை விளக்கமறியலில் வைக்க அனுமதி வழங்கப்பட்டுள்ளது.
இந்நிலையில் இச்சம்பவம் குறித்து பல்வேறு சந்தேகங்கள் எழுப்பப்பட்டுள்ளதுடன் சில முக்கியமான அடிப்படைகளைக் கொண்டு புலனாய்வு பிரிவினரின் விசாரணைகள் இடம்பெறுகின்றன.
முக்கியமாக குறித்த கோப்ரல் வீரர் உள் நுழைந்ததன் நோக்கம் என்ன? அவ்வாறு உள் நுழைந்தவர் ஜனாதிபதியை நெருங்க முற்பட்டதன் மர்மம் என்ன? வாகனத்தில் துப்பாக்கியை வைத்துவிட்டு வந்திருந்தால் இடுப்பில் இருந்த துப்பாக்கி சட்ட விரோத செயல் ஒன்றினை அல்லது சதியொன்றினை நிறைவேற்ற திட்டமிட்டு கொண்டு வரப்பட்டதா? ஜனாதிபதி பாதுகாப்புப் பிரிவு இந்த விவகாரத்தில் கடமை தவறியுள்ளதா? போன்ற பல விடயங்கள் உதவி பொலிஸ் அத்தியட்சகர் சாணி அபேசேகர தலைமையிலான விசாரணைக் குழுவினரின் அவதானத்துக்கு உட்பட்டுள்ளதாக பொலிஸ் ஊடகப் பேச்சாளர் உதவி பொலிஸ் அத்தியட்சகர் ருவன் குணசேகர தெரிவிக்கின்றார்.
அத்துடன் குறித்த தினம் அவ்விடத்தில் கடமையில் ஈடுபட்டிருந்த ஜனாதிபதி பாதுகாப்பு பிரிவின் உதவி பொலிஸ் அத்தியட்சகர் மல்வலகேயிற்கும் இடமாற்றம் வழங்கப்பட்டுள்ளதாகவும் இந்த விவகாரம் குறித்து 15 இற்கும் அதிகமான வாக்கு மூலங்களை புலனாய்வுப் பிரிவினர் பதிவு செய்துள்ளதாகவும் உதவி பொலிஸ் அத்தியட்சர் ருவன் குணசேகர தெரிவித்தார்.
இந்நிலையில் இந்தச் சம்பவம் குறித்து பல்வேறு சந்தேகங்கள் தற்போது வரை எழுப்பப்பட்டுக் கொண்டிருக்கின்றன. குறித்த கோப்ரல் சட்ட விரோதமாக எதனையும் செய்யவில்லையெனில் அவரை வெளியேற்றும்போது தமது பிரபு (நாமல்) உள்ளிருக்க அவரை விட்டு விட்டு எப்படி வெளியேறி இருக்க முடியும். அத்துடன் இந்த சம்பவத்தின் போது ஜனாதிபதிக்கு எதிராக ஏதேனும் சதி முயற்சிகள் பின்னப்பட்டு அதன் பொருட்டு அக்கோப்ரலின் உத்தியோகபூர்வ துப்பாக்கிக்கு பதிலாக வேறு ஒரு சட்ட விரோத துப்பாக்கி கூட பயன்படுத்தப்பட்டிருக்கலாம்.
இதனிடையே மேடைகளிலும் ஊடகங்கள் முன்னும் பேசிவரும் பாராளுமன்ற உறுப்பினர் நாமல் ராஜபக் ஷ கோப்ரலிடம் இருந்தது தண்ணீர் போத்தலே எனவும் துப்பாக்கி இருக்கவில்லை எனவும் அதனாலேயே ஜனாதிபதி பாதுகாப்பு பிரிவினர் அவரை கைது செய்திருக்கவில்லை எனவும் கூறி வருகிறார்.அதிரடிப்படையினரிடமிருந்து அந்த கோப்ரல் சேனக குமாரவை பொறுப்பேற்ற ஜனாதிபதி பாதுகாப்புப் பிரிவின் சார்ஜனும் அவரிடம் துப்பாக்கி எதுவும் இருக்காததாலேயே அவரை விடுவித்ததாக புலனாய்வு பிரிவினருக்கு தெரிவித்துள்ள நிலையில் நேரில் கண்ட சாட்சியங்கள் ஊடாக அவரின் இடுப்பில் கைத் துப்பாக்கியொன்று இருந்தமை உறுதி செய்யப்பட்டதாகவும் அதனாலேயே கோப்ரல் சேனக குமாரவை கைது செய்ததாகவும் நாமலின் தண்ணீர் போத்தல் கதைகள் சாட்சியங்களுக்கு அப்பால் பட்டவை எனவும் பொலிஸ் பேச்சாளர் ருவன் குணசேகர சுட்டிக் காட்டுகின்றார்.
இந்நிலையில் இது தொடர்பாக விசேட அறிக்கை ஒன்றினை வெளியிட்டிருந்த முன்னாள் ஜனாதிபதி மஹிந்த ராஜபக் ஷ அதில் இப்படி குறிப்பிடுகிறார்.
கோப்ரல் குமார எனது பாதுகாப்பு வீரர். எனது கோரிக்கையின் பிரகாரமே அவர் எனது மகன் நாமலுடன் அன்று கூட்டத்துக்கு சென்றார். அவர்களுக்கு பிரபுக்கள் வாயிலினூடாக உள் நுழைய அனுமதி மறுக்கப்படவே அவர்கள் சாதாரண வாயில் ஊடாக உள் நுழைந்துள்ளனர். கோப்ரல் குமார வாயிலிலேயே நின்றுள்ளார்.
சிறிது நேரத்தில் விசேட அதிரடிப்படை வீரர் குமாரவை யார் என கேட்டுள்ளார். அதற்கு தான் இராணுவ வீரர் எனவும் நாமலுடன் பாதுகாப்புக்கு வந்தவர் எனவும் பதிலளித்துள்ளார். அவ்விடத்தில் இருக்க வேண்டாம் என குமாரவுக்கு அறிவுறுத்தல் வழங்கப்படவே அவர் வாகனத்தில் வந்து இருந்துள்ளார். கூட்டத்தின் பின்னர் அனைவரும் வீட்டுக்கு வந்தனர். ஊடகங்கள் ஊடாக வே கோப்ரல் குமார ஆயுதம் கொண்டு போன கதையை தான் அறிந்தேன். என அந்த அறிக்கை ஊடாக மஹிந்த ராஜபக் ஷ சுட்டிக்காட்டியுள்ளார்.
இந்நிலையில் இவ் விவகாரமானது பாரதூரமானது ஜனாதிபதியின் கூட்டம் ஒன்றின் பாதுகாப்பு தொடர்பிலான முழு பொறுப்பும் ஜனாதிபதி பாதுகாப்புப் பிரிவையே சாரும் நிலையில் ஜனாதிபதி பாதுகாப்புப் பிரிவுக்கு பொறுப்பான சிரேஷ்ட பிரதிப் பொலிஸ் மா அதிபர் எஸ்.எம்.விக்ரம சிங்கவும் இதற்கு பொறுப்புக் கூற வேண்டும்.
அங்குணுகொல பெலஸ்ஸ கூட்டத்தில் நடந்த இந்த சம்பவத்தை ஜனாதிபதியின் பாதுகாப்பில் உள்ள பாரிய குறைபாடாகவே நோக்க வேண்டியுள்ளது.
நாட்டின் இரு தலைவர்கள் ஏற்கனவே கொலை செய்யப்பட்டுள்ளார்கள். (பண்டாரநாயக்க, பிரேமதாஸ) என்ற மோசமான வரலாறு கொண்ட நாம் நாட்டின் முதன்மை பிரஜையான ஜனாதிபதியின் பாதுகாப்பில் இதனைவிட விழிப்பாக இருக்க வேண்டும்.
இந்நிலையில் குற்றப்புலனாய்வு பிரிவு முன்னெடுக்கும் விசாரணைகளில் எதிர்காலத்தில் அதிர்ச்சித் தகவல்கள் வெளியானாலும் அது ஆச்சரியப்படுவதற்கில்லை.
No comments
Post a Comment