இவர் 2009ல் இரசாயனவியல் துறையில் நொபெல் பரிசைப் பெற்றவர் இவர்.
பிரிட்டிஷ் அரசாங்கம் வரும் வருடத்தில் வழங்கவுள்ள சிவில் விருதுகளைப் பெறவுள்ளவர்களுக்கான பெயர்ப் பட்டியலை வெளியிட்டுள்ளது.
பிரிட்டிஷ் அரசாங்கத்தின் உயரிய சிவில் விருதான சர் பட்டம், பிரிட்டனில் இருந்து செயல்படக்கூடிய வெளிநாட்டவர்களுக்கு வழங்கப்படுவதென்பது மிகவும் அரிதாகத்தான் நடக்கும்.
பிரிட்டனின் கேம்பிரிட்ஜ் பல்கலைக்கழகத்தில் இருந்தபடி மைக்ரோபயாலஜியில் முன்னணி ஆராய்ச்சிகளை மேற்கொண்டுவரும் 58 வயதான ராமகிருஷ்ணன், சர்ப் பட்டம் தனக்கு கிடைத்திருப்பதை இட்டு மகிழ்ச்சி வெளியிட்டுள்ளார்.
பிரிட்டிஷ் சமூகத்தில் குடியேறிகள் வழங்கும் பங்களிப்பை பிரிட்டிஷ் அரசாங்கம் அங்கீகரிக்கிறது என்பதன் அடையாளம் இது என்று அவர் குறிப்பிட்டுள்ளார்.
ராமகிருஷ்ணனைத் தாண்டி வேறு இரண்டு வெளிநாட்டுப் பிரஜைகளுக்கும் இவ்வாண்டு நைட்ஹுட் வழங்கப்படுகிறது.
சென்ற வருடம் இயற்பியலுக்காக நொபெல் பரிசு வாங்கிய ரஷ்யாவில் பிறந்த ஆந்த்ரே கெய்ம் மற்றும் கொன்ஸ்டாண்டின் நொவொஸொலொவ் ஆகியோர் இவர்கள்.
ஆப்பிள் நிறுவனத்தின் ஐஃபோன், ஐபேட் போன்றவற்றை வடிவமைத்தவரான ஜோனதன் ஐவிக்கும் சர் பட்டம் வழங்கப்பட்டுள்ளது.
சாமானியருக்கு சிவில் விருதுகள்
சர் பட்டங்களைத் தாண்டி ஓ.பி.இ., எம்.பி. இ. என வேறு பல சிவில் விருதுகளையும் பிரிட்டிஷ் அரசாங்கம் வருடா வருடம் வழங்கிவருகிறது.
இவ்வருடத்தில் இவ்வகையான விருது பெறுவோரில் எழுபது சதவீதமானோர் தமது சமூகங்களில் தன்னார்வத் தொண்டராகவோ அல்லது பொறுப்புதாரியாகோ இருந்து சிறப்பாக பணியாற்றிய சாமானிய மக்களாவர்.
பள்ளிக்கூடப் பிள்ளைகளுக்கு மதிய உணவு வழங்கும் பெண் ஊழியரில் , உதவிப் பணிகளுக்கு நிதி திரட்டிய தேவாலய ஊழியர், போதை மருந்து கடத்துபவராக இருந்து மனம் திருந்தி வன்முறை மிக்க குற்றங்களில் இருந்து இளைஞர்களை திசைத் திருப்ப உதவும் பிரச்சாரப் பணியில் பங்காற்றியவர் என சமூகத்தின் பல்வேறு பிரிவைச் சேர்ந்தவர்களுக்கு இம்முறை இந்த விருதுகள் வழங்கப்படுவது குறிப்பிடத்தக்கது.
No comments
Post a Comment