சீரற்ற காலநிலையினால் ஏற்பட்டுள்ள வெள்ளப்பெருக்கு மற்றும்
மண் சரிவுகளினால் மக்களின் அவல நிலைமை தொடர்ந்து அதிகரித்த
வண்ணமுள்ளது.
மழை வீழ்ச்சி குறைவாக பதிவான போதிலும் வெள்ளப் பெருக்கு ஏற்பட்ட இடங்களில் நீர் இன்னமும் வடிந்தோடவில்லை. இந்நிலையில் நேற்றைய தினம் வரை 98 ஆயிரத்து 76 குடும்பங்களை சேர்ந்த 4 இலட்சத்து 14 ஆயிரத்து 627 பேர் மோசமாக பாதிக்கப்பட்டுள்ளனர்.
அத்துடன் உயிரிழப்புகள் எண்ணிக்கை 56 பேர் வரை அதிகரித்துள்ளன. மேலும் 134 க்கும் மேற்பட்டோரை காணவில்லை. 3 இலட்சத்து 6 ஆயிரத்து 773 க்கும் அதிகமானோர் இடம்பெயர்ந்துள்ளனர்.
இதன்பிரகாரம் இடம்பெயந்துள்ள 61 ஆயிரத்து 382 குடும்பங்கள் சுமார் 594 முகாம்களில் பாதுகாப்பாக தங்கவைக்கப்பட்டுள்ளனர். அத்துடன் மண்சரிவு , வௌ்ளபெருக்கு மற்றும் காற்றினால் 3200 வீடுகள் முழுமையாக சேதமடைந்துள்ளதாக அனர்த்தக முகாமைத்துவ மத்திய நிலையம் அறிவித்துள்ளது.
இதேவேளை அரநாயக்க மற்றும் புலத் கொஹுபிட்டிய போன்ற பிரதேசங்களில் ஏற்பட்ட மண்சரிவினால் பாரிய சேதம் ஏற்பட்டிருந்தது. மண்சரிவில் மூன்று கிராமங்கள் முழுமையாக புதையுண்டன. இதன்காரணமாக 150 பேர் காணவில்லை. 27 பேரின் சடலங்கள் மீட்கப்பட்டுள்ளன. நேற்றைய தினத்தின் அதிக மழை பொழிவின் காரணமாக மீட்பு பணிகள் மந்த நிலைமையில் காணப்படுவதாக இராணுவம் அறிவித்துள்ளது
இதேவேளை நேற்றைய தினத்தின் போதும் களனி கங்கையின் நீர் மட்டம் அதிகரித்திருந்தது. குறிப்பாக மலையக பிரதேசங்களில் பொழிகின்ற மழை நீர் அனைத்தும் களனி கங்கைக்கே ஒன்று சேருவதன் விளைவாக களனி கங்கையின் நீர் மட்டம் அதிகரித்தது. இதனால் களனி , நவகம்புர, வெல்லம்பிட்டி, அவிசாவளை, ஹங்வெல்ல மற்றும் பேலியகொட ஆகிய பகுதிகளுக்கே பாதிப்புகள் ஏற்பட்டன.
வெல்லம்பிட்டி, களனி, அவிசாவளை உள்ளிட்ட பகுதிகளில் நீர் வடிந்தோடாததன் காரணமாக மக்கள் பெரும் சிரமங்களை எதிர்கொண்டனர்.
களனி பிரதேசத்தில் வௌ்ளம் பெருக்கின் காரணமாக தொடலங்க மற்றும் கொழும்பு கண்டி வீதியின் போக்குவரத்தில் பெரும் பாதிப்பு ஏற்பட்டிருந்தது. களினி பகுதியின் வௌ்ளபெருக்கு காரணமாக கட்டுநாயக அதிவேக பாதை பேலியகொடை பிரதான நுழைவாயிலுக்கு அருகில் பாரிய வாகன நெரிசல் காணப்பட்டது.
அத்துடன் சீரற்ற காலநிலை காரணமாக கல்வி நடவடிக்கை முழுமையாக பாதிக்கப்பட்டுள்ளது. இதன்பிரகாரம் இன்றைய தினம் நாடளாவிய ரீதியிலுள்ள அனைத்து பாடசாலைகளுக்கும் விடுமுறை தினமாக அரசாங்கத்தினால் பிரகடனப்படுத்தப்பட்டுள்ளது.
மேலும் கடலோர பிரசேதங்களுக்கான வளிமண்டவியல் திணைக்களத்தின் எச்சரிக்கை தொடர்ந்தும் நீடிக்கப்பட்டுள்ளது. குறிப்பாக வடக்கு உள்ளிட்ட கடலோர பகுதிகளில் கடுமையான காற்று வீசும் என திணைக்களம் அறிவித்திருந்தது. மேலும் 8 மாவட்டங்களுக்காக மண்சரிவு அபாய எச்சரிக்கையும் நேற்று நீடிக்கப்பட்டிருந்தது.
கொழும்பு மாவட்டம்
இடைவிடாது தொடர்ந்து பெய்து வரும் கடும் மழை காரணமாக களனி கங்கையின் நீர் மட்டம் அதிகரிக்க தொடங்கியதனை அடுத்து கொழும்பில் வௌ்ளப்பெருக்கு ஏற்பட்ட பிரதேசங்களின் நீர் மட்டம் பன்மடங்கு அதிகரித்துள்ளது. இதன்பிரகாரம் கொழும்பு நகரின் வெல்லம்பிட்டிய , கொலன்னாவை உள்ளிட்ட பிரசேதங்களிலிருந்து நேற்றைய தினமும் மக்கள் தொடர்ந்து வெளியேறிவருகின்றனர். இருந்தபோதிலும் 200 குடும்பங்கள் வௌ்ளத்தில் சிக்குண்டு பாதுகாப்பதற்கு எவருமின்றி தத்தளித்தாக தெரியவருகின்றது. இதுவரைக்கும் கொழும்பு நகரில் வெல்லம்பிட்டிய மற்றும் கொலன்னாவை பிரசேதங்களே அதிகளவில் பாதிக்கப்பட்டன.
குறித்த பிரசேதங்களில் மாத்திரம் 18 ஆயிரத்து 756 குடும்பங்களை சேர்ந்த சுமார் 94 ஆயிரத்து 151 பேர் 16 முகாம்களில் தங்கவைக்கப்பட்டுள்ளனர். இதன்பிரகாரம் கொழும்பு மாவட்டத்தில் மாத்திரம் 35ஆயிரத்து 839 குடும்பங்களை சேர்நத 1 இலட்சத்து 70 ஆயிரத்து230 பேர் பாதிக்கப்பட்டுள்ளனர். மேலும் 35 ஆயிரத்து 725 குடும்பங்களை சேர்ந்த 1 இலட்சத்து 70ஆயிரத்து 403 பேர் இடம்பெயர்ந்து 64 முகாம்களில் தங்கவைக்கப்பட்டுள்ளனர்.
கம்பஹா , களுத்துறை
இதேவேளை கம்பஹா மாவட்டத்தில் 29 ஆயிரத்து 732குடும்பங்களை சேர்ந்த ஒரு இலட்சத்து 22 ஆயிரத்து 232 பேர் பாதிக்கப்பட்டுள்ளனர். களனியில் மாத்திரம் 28 ஆயிரத்து 178 பேர் இடம்பெயர்ந்துள்ளனர். களுத்துறை மாவட்டத்தில் 9240 பேர் பாதிக்கப்பட்டுள்ளனர்.
கேகாலை ,இரத்தினபுரி
கேகாலை மாவட்டத்தில் 12 ஆயிரத்து 757 பேர் பாதிக்கப்பட்டுள்ளனர். 2737 பேர் இடம்பெயர்ந்துள்ளனர்.மேலும் கேகாலையில் இதுவரைக்கும் 30 பேர் உயிரிழந்துள்ளனர். 150க்கு மேற்பட்டோர் காணாமல் போயுள்ளனர்
இரத்தினபுரி மாவட்டத்தில் கடும் காற்று , மழை காரணமாக 2859 குடும்பங்களை சேர்ந்த 11ஆயிரத்து 232 பேர் பாதிக்கப்பட்டுள்ளனர். மேலும் 6449 பேர் இடம்பெயர்ந்துள்ளனர்.
மலையகம்
நாட்டின் ஏனைய பகுதிகளை விடவும் நேற்றைய தினம் மலையகத்தில் கடும் மழை பெய்தது. இதன்காரணமாக பல பிரசேதங்கள் நீரில் மூழ்கியதுடன் மண்சரிவு அனர்த்தம் பல இடங்களுக்கு ஏற்பட்டிருந்தது. குறிப்பாக நேற்று முன் தினம் கண்டி மாவட்டத்தில் கடுகண்ணாவ பிரதேத்தில் பாரிய மண்சரிவு அனர்த்தம் ஏற்பட்டிருந்தது. இதனால் ஆறு பேர் மண்சரிவில் சிக்குண்டனர். அதேபோன்று தெல்தொடை, நாவலப்பிட்டிய, கலகெதர போன்ற பிரதேசங்களில் மண்சரிவு ஏற்பட்டது.
மேலும் நுவரேலியா மாவட்டத்தில் 754 குடும்பங்களை சேர்ந்த 3132 பேர் மண்சரிவு காரணமாக இடம்பெயர்ந்துள்ளனர். அத்துடன் மாத்தளை மாவட்டத்தில் பாதிப்பு குறைவாகவே பதிவாகியுள்ளது.
வடக்கு ,கிழக்கு
வடக்கு மாகாணத்தில் மாத்திரம் 11 ஆயிரத்து 171 குடும்பங்களை சேர்ந்த 37 ஆயிரத்து 550 பேர் பாதிக்கப்பட்டுள்ளனர். இதன்பிரகாரம் வடக்கில் கிளிநொச்சி மாவட்டத்திலேயே மிகவும் மோசமான பாதிப்புகள் ஏற்பட்டுள்ளன. இதன்பிரகாரம் 5464 குடும்பங்களை சேர்ந்த 18 ஆயிரத்து 265 பேர் பாதிப்படைந்து 1163 பேர் இடம்பெயர்ந்துள்ளனர். யாழ்ப்பாணத்தில் மாத்திரம் ஆயிரத்து 572 குடும்பங்களை சேர்ந்த 6 ஆயிரம் பேர் வௌ்ள பெருக்கினால் பாதிக்கப்பட்டுள்ளனர். யாழ் நகரிலேயே அதிகளவில் பாதிப்புகள் ஏற்பட்டுள்ளன.
இதேவேளை வவுனியா மாவட்டத்தில் 1100 குடும்பங்களை சேர்ந்த 4 ஆயிரத்து 127 பேர் வௌ்ளத்தினால் பாதிக்கப்பட்டுள்ளனர். 32 வீடுகள் சேதமடைந்துள்ளன. அத்துடன் மன்னார் மாவட்டத்தில் 1488 குடும்பங்கள் பாதிக்கப்பட்டுள்ளனர். மேலும் முல்லைதீவு மாவட்டத்தில் 1458 குடும்பங்களை சேர்ந்த 4000 பேர் பாதிக்கப்பட்டுள்ளனர். மேலும் கிளிநொச்சியிலும் கடும் காற்றுடன் கூடிய காலநிலை நிலவிவருகின்றது.
யாழ்ப்பாணம் மற்றும் மன்னார் போன்ற பிரசேதங்களில் மீன்பிடி துறைகளில் பெரும் பாதிப்புகள் ஏற்பட்டுள்ளன. கடும் காற்றுடன் கூடிய காலநிலை காரணமாக படகுகளும் சேதமடைந்துள்ளன.
கிழக்கு மாகாணத்தில் குறைந்தளவிலான பாதிப்புகளே பதிவாகியுள்ளன. இருந்தபோதிலும் திருகோணமலை மாவட்டத்தில் 14 குடும்பங்கள் பாதிக்கப்பட்டுள்ளதுடன் 18 பேர் இடம்பெயர்ந்துள்ளனர்.
குருநாகல் , புத்தளம்
வடமேல் மாகாணத்தில் புத்தளம் மாவட்டத்திற்கே அதிகளவிலான சேதம் ஏற்பட்டுள்ளது. குறிப்பாக 8906 குடும்பங்களை சேர்ந்த 33 ஆயிரம் 788 பேர் பாதிக்கப்பட்டுள்ளனர்.
குருநாகல் மாவட்டத்தில் 2000 குடும்பங்கள் பாதிக்கப்பட்டுள்ளதுடன் 2000 க்கும் மேற்பட்டோர் இடம்பெயர்ந்துள்ளனர்.
No comments
Post a Comment